ចាស់តែចិត្តឆៅ! លោកតាអាយុ ៨១ ឆ្នាំម្នាក់ ដុតមណ្ឌលថែទាំមនុស្សចាស់ចោល ព្រោះខឹងមិនឱ្យគាត់ទៅក្រៅជាមួយសង្សារ

លោកតាអាយុ ៨១ ឆ្នាំម្នាក់នៅប្រទេសម៉ាឡេស៊ី ផ្ទុះកំហឹងខ្លាំងរហូតដល់ថ្នាក់លួចដុតមណ្ឌលថែទាំចាស់ជរាដែលគាត់ស្នាក់អាស្រ័យចោល ក៏ព្រោះតែខាងមណ្ឌលមិនអនុញ្ញាតឱ្យគាត់ចេញទៅក្រៅយកឧបករណ៍ជំនួយការស្ដាប់ជាមួយមិត្តស្រី។

តាមការចេញផ្សាយរបស់កាសែតម៉ាឡេស៊ី Harian Metro បានឱ្យដឹងថា មណ្ឌលថែទាំមនុស្សចាស់ខាងលើមានទីតាំងស្ថិតនៅក្រុង Padang Besar រដ្ឋ Perlis ប្រទេសម៉ាឡេស៊ី ដែលមានមនុស្សចាស់ស្នាក់អាស្រ័យសរុបចំនួន ២០ នាក់ រួមទាំងលោកតាម្នាក់ដែលគេជឿថាជាអ្នកដុតភ្លើងនៅវេលាម៉ោង ៨ និង ៣១ នាទីព្រឹកថ្ងៃទី ១៤ ខែសីហា ឆ្នាំ ២០២៥ កន្លងទៅនោះផង។

តាមប៉ូលិសបានរៀបរាប់ថា៖ «តាមការពិនិត្យមើលកាមេរ៉ាសុវត្ថិភាពនៅក្នុងមណ្ឌលបានបង្ហាញថា លោកតាអាយុ ៨១ ឆ្នាំនៅក្នុងមណ្ឌលនោះជាអ្នកដុតភ្លើង។ ជនសង្ស័យ ទំនងជាចាប់ដុតភ្លើងពីទូនៅចង្ក្រានបាយក្នុងបណ្ឌល បណ្ដាលឱ្យរាលដាលឆេះដល់បរិវេណធំឆេះខូចខាតអស់ ៥០%»។

តាមការស្រាវជ្រាវក្រោយមកទៀតក៏រកឃើញថា មូលហេតុដែលដុតមណ្ឌលនេះគឺដោយសារតែជនសង្ស័យមិនពេញចិត្តចំពោះអ្នកថែទាំក្នុងមណ្ឌលដែលមិនអនុញ្ញាតឱ្យគាត់ទៅក្រៅយកឧបករណ៍ជំនួយត្រចៀកជាមួយមិត្តស្រីដែលជាអ្នករស់នៅក្នុងមណ្ឌលជាមួយគ្នានោះ។ គួរបញ្ជាក់ដែរថា ភ្លាមៗជនសង្ស័យត្រូវបានចាប់ខ្លួនមុនដោះលែងឱ្យនៅក្រៅឃុំបណ្ដោះអាសន្នវិញ រង់ចាំប៉ូលិសស៊ើបអង្កេតបន្តសិន៕

ប្រភព៖ World Of Buzz