បើនិយាយដល់តារាសម្ដែង Sammy Sum ប្រិយមិត្តដែលនិយមទស្សនាខ្សែភាពយន្តរបស់ទូរទស្សន៍ TVB ប្រាកដណាស់ជាធ្លាប់ស្គាល់លោកហើយ ព្រោះតារាប្រុសរូបនេះលេចមុខក្នុងភាពយន្តល្បីៗជាច្រើនមិនសូវបាត់មុខនោះឡើយ។
យ៉ាងណាមិញ ថ្មីៗនេះមានមហាជនម្នាក់បានទម្លាយតាមបណ្ដាញសង្គម Threads ថា រូបលោកបានកក់ Uber ជិះ ហើយអ្វីដែលធ្វើឱ្យលោកភ្ញាក់ផ្អើលនោះគឺតៃកុងឡានគឺជាតារាសម្ដែងប្រុសវ័យ ៤១ ឆ្នាំខាងលើ។ ការបង្ហោះរបស់បុរសនេះដែរបានផ្ទុះការចែករំលែកជាខ្លាំងរហូតធ្វើឱ្យសាមីខ្លួន លោក Sammy បានចេញមុខមកឆ្លើយតបក្នុងការបង្ហោះលើ Instagram ដោយលោកបានតបទាំងសើចថា៖ «ខ្ញុំមិនដឹងសោះថាវាអាចធ្វើឱ្យមានព័ត៌មានច្រើនបែបនេះ»។
យ៉ាងណាមិញ ក្រោយការនិយាយលេងសើច លោក Sammy ក៏បានបន្តបកស្រាយពីបញ្ហាដែលលោកកំពុងជួបប្រទះឥលូវដែរថា លោកបានវិនិយោគប្រាក់ជាច្រើនលើការបើកកន្លែងហាត់ប្រាណមួយកន្លែង ប៉ុន្តែតាំងពីបើកមក មុខជំនួញរបស់លោកមួយនេះគឺមិនទទួលបានចំណូលគ្រប់គ្រាន់នោះឡើយ សូម្បីតែដើមវិនិយោគក៏មិនទាន់បានគ្រប់វិញដែរដោយលោកលើកហេតុផលពីបញ្ហាសេដ្ឋកិច្ចមិនអំណោយផល។
កន្លែងហាត់ប្រាណរបស់លោកនោះដែរមានឈ្មោះថា «111 Ones Fitness» ដែលមានទីតាំងនៅ Causeway Bay។ លោកបានបើកកន្លែងហាត់ប្រាណនេះក្នុងឆ្នាំ ២០២៣ ដោយបើកជាមួយមិត្តស្រីលោក តារាសម្ដែងស្រី Shirley Chan។ បើទោះជាជួបបញ្ហាលុយកាក់ប៉ុន្តែលោក Sammy នៅតែបន្តតស៊ូលើមុខជំនួញមួយនេះមិនបោះបង់ឡើយ លោកបានរៀបរាប់ថា៖ «ខ្ញុំអត់មានប្រាក់ខែទេ ប៉ុន្តែបុគ្គលិកខ្ញុំត្រូវបើកឱ្យពួកគេឱ្យទាន់ពេលវេលា ហើយដោយសារតែខ្ញុំចូលចិត្តបើកឡានស្រាប់ ខ្ញុំក៏គិតថាគួរតែចុះឈ្មោះលើ Uber ហើយឱ្យនរណាម្នាក់ជួយកំណត់គោលដៅឱ្យខ្ញុំទៅ»។
បន្ថែមពីនេះ លោកក៏បានលើកទឹកចិត្តដល់អ្នកតាមដានលោកទាំងអស់ឱ្យថែរក្សាសុខភាព និង បានអរគុណគ្រប់គ្នាដែលតែងតែគាំទ្រលោករហូតមក។ ក្រោយការឆ្លើយតប មហាជនជាច្រើនបានសម្ដែងការស្ញើចសរសើរចំពោះលោកដែលមានភាពស្មោះត្រង់ចំពោះមុខរបរចិញ្ចឹមជីវិតរបស់លោក៕
