ថ្មីៗនេះ ទូរទស្សន៍ India TV បានចេញផ្សាយទិដ្ឋភាពស្ដែងៗដ៏រន្ធត់នៃហេតុការណ៍គ្រោះថ្នាក់មួយដែលបានកើតមានឡើងលើអ្នកទេសចរមួយក្រុមដែលបានជិះទូកលេងកម្សាន្តលើផ្ទៃទន្លេគង្គា រហូតឆក់យកអាយុជីវិតរបស់បុរសវ័យ ២៨ ឆ្នាំម្នាក់។
ជនរងគ្រោះត្រូវបានស្គាល់ឈ្មោះថា Sagar Negi ជាអ្នកក្រុង Dehradun រដ្ឋ Uttarakhand ប្រទេសឥណ្ឌា បានធ្វើដំណើរទៅកាន់ក្រុង Rishikesh ជាមួយមិត្តភក្តិដើម្បីជិះទូកលេងកម្សាន្ត។ ហេតុការណ៍ដ៏សោកសៅខាងលើនេះដែរ បានកើតឡើងនៅតំបន់ Munikireti ដែលជាទីកន្លែងពួកគេចាប់ផ្ដើមជិះទូក។ តាមអាជ្ញាធរក្នុងតំបន់បានបញ្ជាក់ថា ទូកមួយនោះមានមនុស្សជិះច្រើននាក់ដែរ ហើយខណៈកំពុងជិះនោះពួកគេក៏ជួបប្រទះបញ្ហាពេលទូកត្រូវបានទឹកកួចចូលក្បែរស្ពាន Garud Chatti។
ក្នុងពេលកំពុងជួបភាពចលាចលលើទឹកនោះដែរ ជនរងគ្រោះឈ្មោះ Sagar បានបាត់បង់លំនឹងខ្លួនរួចក៏ធ្លាក់ចូលទៅក្នុងទឹកទន្លេ។ ឃើញបែបនោះទាំង guide និង អ្នកជិះជាមួយផ្សេងទៀតបាននាំគ្នាព្យាយាមជួយសង្គ្រោះដែរ ប៉ុន្តែមិនទទួលបានជោគជ័យឡើយ។
វីដេអូឃ្លីបស្ដែងៗនៃហេតុការណ៍ខាងលើបានបង្ហោះចែកចាយលើបណ្ដាញសង្គមនៅឥណ្ឌាកាលពីថ្ងៃទី ១៨ ខែមេសា ឆ្នាំ ២០២៥ កន្លងទៅ ដោយវីដេអូនោះផ្ទុះចាប់អារម្មណ៍ និង ចែកចាយច្រើនមែនទែន រហូតធ្វើឱ្យមានការវែកញែកជុំវិញសុវត្ថិភាពនៃការជិះទូកលេងនៅក្រុង Rishikesh។
គួរបន្ថែមដែរថា ជនរងគ្រោះ Sagar ត្រូវបានទាញយកឡើងមកលើគោកក្នុងសភាពលែងដឹងខ្លួនទៅហើយ បើទោះជា guide ព្យាយាមសង្គ្រោះបឋមយ៉ាងណាក៏លោកនៅតែមិនដឹងខ្លួនដដែល។ ក្រោយមក លោកក៏ត្រូវបានបញ្ជូនទៅមន្ទីរពេទ្យសង្គ្រោះភ្លាមៗផងដែរ ប៉ុន្តែពេលទៅដល់ក្រុមគ្រូពេទ្យបានប្រកាសថាលោកបានផុតដង្ហើមទៅហើយ។ សាកសពរបស់ជនរងគ្រោះត្រូវបានបញ្ជូនបន្តដើម្បីធ្វើកោសល្យវិច័យរកមូលហេតុស្លាប់ពិតប្រាកដ។
ក្រុង Rishikesh ជាទីតាំងទេសចរណ៍ដ៏ល្បីល្បាញមួយក្នុងប្រទេសឥណ្ឌា ដែលអ្នកទេសចរភាគច្រើនទៅទទួលបទពិសោធផ្នែកសាសនា និង ការកម្សាន្តកីឡាបែបផ្សងព្រេងដូចជា ការលោត bungee jumping ការឡើងភ្នំ និង ជាពិសេសនោះគឺការជិះទូកលើទន្លេគង្គានេះតែម្ដង ដែលទាក់ទាញភ្ញៀវទេសចររាប់ពាន់នាក់ជារៀងរាល់ឆ្នាំ៕
