ខៀវ សានសាណា ថាសល់តែរូបថត និង អនុស្សាវរីយ៍ល្អៗជាមួយម្ដាយក្មេកប៉ុណ្ណោះ

ថ្មីៗនេះ ខៀវ សានសាណា បានប្រកាសដំណឹងដ៏សែនក្រៀមក្រំ គឺម្ដាយក្មេករបស់នាងបានទទួលមរណភាពកាលពីថ្ងៃទី ១៩ ខែមករា ឆ្នាំ ២០២៣ កន្លងទៅ នៅលើទឹកដីប្រទេសអូស្ដា្រលី។

ក្រោយទទួលបានដំណឹងដ៏ក្រៀមក្រំខាងលើ ខៀវ សានសាណា និង ស្វាមី មិនបានហោះហើរទៅចូលរួមពិធីបុណ្យសពជូនអ្នកមានគុណភ្លាមៗទេ ដោយប្ដីប្រពន្ធអ្នកទាំងពីរនៅបំពេញភារកិច្ចនៅស្រុកខ្មែរ មិនទាន់អាចចាកចេញបាន តែយ៉ាងណាពិធីការិនីរូបនេះបានលើកឡើងថា នាងនឹងធ្វើដំណើរនៅប្រទេសអូស្ត្រាលីនៅយប់ថ្ងៃទី ២៦ ខែមករា ឆ្នាំ ២០២៣ ហើយ។

ក្នុងនោះ ខៀវ សានសាណា បានបង្ហាញក្ដីអាឡោះអាល័យចំពោះម្ដាយក្មេកជាខ្លាំង ព្រោះម្ដាយក្មេកនាងស្រឡាញ់ពេញចិត្តនាងប្រៀបដូចកូនស្រីបង្កើត។ ពិធីការិនីដ៏ឆ្នើមខាងលើបានលើកឡើងយ៉ាងស្រណោះថា ៖ «នៅសល់តែរូបថត និង អនុស្សាវរីយ៍ល្អៗជាមួយម៉ាក់ក្មេក។ ថ្ងៃនេះត្រូវទៅបំពេញការងារនៅខេត្តបាត់ដំបង១ថ្ងៃសិន។ ស្អែកយប់ហោះទៅទីក្រុងស៊ីដនី ដើម្បីធ្វើបុណ្យសព និង លាជាលើកចុងក្រោយ»៕