ស្មានមិនដល់ នៅពីក្រោយស្នាមញញឹម Punjan ធ្លាប់កើតជំងឺនេះ ដល់ថ្នាក់មិនហ៊ានចេញក្រៅផ្ទះ

បើសិនជានឹកដល់រឿង «បុព្វេសន្និវាស» ខ្សែភាពយន្តភាគថៃដ៏ល្បីកក្រើកប្រទេសប្រចាំឆ្នាំ ២០១៩ នោះ ជឿជាក់ថាមហាជនចាំជាក់ជាមិនខានតួអង្គ ឃុនរឿង ដែលសម្ដែងដោយតារាប្រុសលោក Punjan Prama ។ បន្ទាប់ពីចូលខ្លួនសម្ដែងក្នុងរឿង «បុព្វេសន្និវាស» នោះមក គេហាក់កត់សម្គាល់ឃើញថាតារាប្រុសរូបនេះ ផ្ទុះការគាំទ្រខ្លាំងពីសំណាក់មហាជន ។

ទោះបីមានឈ្មោះបោះសំឡេងខ្លាំង តែតារាសម្ដែងលោក Punjan ក៏ធ្លាប់ត្រូវបានមហាជនរិះគន់ច្រើនដែរ រហូតដល់តារាប្រុសរូបនេះបាក់ស្បាតមិនហ៊ានចេញក្រៅផ្ទះទៀតផង ។ ជាក់ស្ដែង កន្លងទៅថ្មីៗនេះ តារាប្រុសលោក Punjan ទើបតែឡើងកម្មវិធីសម្ភាសមួយ ហើយទម្លាយពីអារម្មណ៍របស់ខ្លួន ខណៈដែលលោកធ្លាប់ជួបរឿងរិះគន់ ស្ទើរតែធ្វើឱ្យលោកពុំហ៊ានចេញជួបមុខនរណា។

ក្នុងកម្មវិធីនោះ តារាប្រុស Punjan បានទម្លាយថា ក្នុងមួយជីវិតនេះ លោកមិននឹកស្មានថាត្រូវជួបរឿងជេរប្រមាថរិះគន់ខ្លាំងបែបនេះឡើយ ។ មួយថ្ងៃៗ លោកតែងនៅក្នុងបន្ទប់សំងំលាក់ខ្លួនមិនចេញមកក្រៅនោះទេ យូរៗទៅធ្វើឱ្យលោកកើត ជំងឺធ្លាក់ទឹកចិត្ត ត្រូវលេបថ្នាំរំងាប់អារម្មណ៍ជារឿងរាល់ថ្ងៃ សូម្បីបច្ចុប្បន្ននេះ រឿងនោះបានសាបរលាបទៅក៏ពិតមែន តែលោកក៏នៅតែបន្តលេបថ្នាំដដែល ។

លើសពីនោះ សូម្បីតែរឿងបែកសង្សារ ក៏ព្រោះតែហេតុផលលោកកើត ជំងឺធ្លាក់ទឹកចិត្ត នេះដែរ អាចនិយាយថាវាជាចំណែករួមមួយដែលលោកត្រូវធ្វើបែបនេះ។

បន្ទាប់ពីបានស្ដាប់ការរៀបរបស់តារាប្រុសហើយ ពិតធ្វើឱ្យមហាជនកើតក្ដីរំជួលចិត្តតាម ព្រោះធ្លាប់តែឃើញលោកជាមនុស្សរីករាយ លេងសើចច្រើន តែមិននឹកស្មានថាជីវិតពិតរបស់លោកកើតជំងឺបាក់ទឹកចិត្តសោះ៕