សុទ្ធ បញ្ចកា នៅតែតាមបារម្ភមិនដាច់ចិត្តពី អេដវីន ទោះគេយកទៅព្រៃស

កាលពីថ្ងៃទី ២៣ ខែមិថុនា ឆ្នាំ ២០២១ កន្លងទៅនេះ តារាសម្តែង អេដវីន ត្រូវបានសមត្ថកិច្ចជំនាញ នៃការិយាល័យប្រឆាំងការជួញដូរមនុស្ស កងរាជអាវុធហត្ថរាជធានីភ្នំពេញ បានបញ្ជូនទៅកាន់ ពន្ធនាគារព្រៃស តាមដីកាបង្គាប់ឲ្យឃុំខ្លួន លេខ៖ ៤៤៣៥ “ញ”ដ.ឃ.ដ ចុះថ្ងៃទី ២៣ ខែមិថុនា ឆ្នាំ ២០២១ របស់សាលាដំបូងរាជធានីភ្នំពេញ ។

ក្នុងនោះ តារាប្រុសរូបត្រូវបានសាលាដំបូងរាជធានីភ្នំពេញ សម្រេចដាក់ឱ្យស្ថិតក្រោមការពិនិត្យពីបទអំពើហិង្សាប្រព្រឹត្តដោយសហព័ទ្ធ ឬ អនិតិសង្វាសជន និង បទធ្វើឱ្យខូចខាតដោយចេតនា ដោយសម្រេចឱ្យឃុំខ្លួនជាបណ្តោះអាសន្ន ។

យ៉ាងណាមិញ បើក្រឡេកមកមើលអ្នកនាង សុទ្ធ បញ្ចកា ឯនោះវិញ បើទោះជាខ្លួនបានព្យាយាមដកពាក្យបណ្តឹងពីអតីតគូស្នេហ៍ក្តី កាលពីថ្ងៃទី ១៧ ខែមិថុនា ឆ្នាំ ២០២១ កន្លងមក តែទីបំផុត អេដវីន នៅតែត្រូវបញ្ជូនចូលពន្ធនាគារព្រៃសដដែល ។

បន្ថែមពីនោះ ពាក់ព័ន្ធនឹងការដកពាក្យបណ្តឹង ក៏ដូចជារូបភាព ២ សន្លឹក ដែលតារាសម្តែង អេដវីន ទៅកាន់ពន្ធនាគារព្រៃសរហើយនោះ មហាជនអ្នកលេងបណ្តាញសង្គមហ្វេសប៊ុក បានឃើញអ្នកនាង សុទ្ធ បញ្ចកា​ ក៏ទៅកាន់ទីនោះដូចគ្នា ។ បើតាមការមើលរូបភាពអ្នកនាងនៅក្បែរអតីតគូស្នេហ៍ដូចដើម ដែលធ្វើឱ្យមហាជនបានលើកឡើងថា អ្នកនាង សុទ្ធ បញ្ចកា ដូចជានៅតែនឹកបារម្ភលោក អេដវីន ក្នុងនាមជាអ្នកធ្លាប់ស្រឡាញ់រស់នៅជាមួយគ្នាដូចប្តីប្រពន្ធដូចដើម ៕