សំងំៗអតីតតារាសម្តែង វ៉ាន់ ម៉ូនិច ត្រៀមសម្រាលកូនទីពីរ ឯជីវិតវិញឡូយឆាយអស់ទាស់

ពេលនេះអតីតតារាសម្តែងធ្មេញច្រពើស វ៉ាន់ ម៉ូនិច កំពុងរស់នៅយ៉ាងមានក្តីសុខក្នុងជីវភាពយ៉ាងធូរធារ ក្រោយពីនាងបានភ្ជាប់ស្នេហ៍ជាមួយស្វាមីជាឧកញ៉ា ។ អ្វីដែលចាប់អារម្មណ៍ថ្មីៗនេះ អតីតតារាសម្តែងរូបនេះក៏ត្រៀមខ្លួននឹងទទួលសមាជិកថ្មីនៅក្នុងពេលឆាប់ៗនេះផងដែរ ។

ជាការពិតប្រណាំងរថយន្ត ម៉ូតូ អាចប្រណាំងបាន ប៉ុន្តែសម្រាប់ការប្រណាំងប្រជែងជាមួយព្រេងសំណាងនោះពិតជាមិនបានឡើយ ។ ជាក់ស្តែងក្រោយពីជួបប្រទះនូវរឿងមិនសមប្រកបជាច្រើន ពេលនេះអតីតតារាសម្តែង វ៉ាន់ ម៉ូនិច កំពុងរស់នៅយ៉ាងសុខស្រួលក្នុងជីវភាពខ្ពស់ខ្ពស់ក្នុងនាមជាជំទាវយ៉ាងស្របច្បាប់ថែមទៀតផង ។

ពេលនេះដែរ វ៉ាន់ ម៉ូនិច ក៏កំពុងពពោះកូនទីពីរជាកូនស្រីដែលត្រៀមសម្រាលនៅក្នុងពេលឆាប់ៗនេះ ។ បាត់មុខជាអាជីពសិល្បៈប្រមាណជាបួនឆ្នាំ ប៉ុន្តែ វ៉ាន់ ម៉ូនិច ក៏ដូចជាស្វាមីតែងលេចមុខនៅក្នុងសកម្មភាពមនុស្សធម៌ជាច្រើនដែល ថ្មីៗនេះនាងក៏បានចូលរួមនៅក្នុងការជួយសង្គមកំឡុងពេលជំងឺកូវីដ-១៩ រាតត្បាតចំនួន ១០ លានរៀលដល់ រដ្ឋបាលរាជធានីភ្នំពេញផងដែរ ។

ទោះពោះខ្ទាតធំត្រៀមសម្រាលកូនទីពីរក៏ពិតមែន ប៉ុន្តែគេសង្កេតឃើញ វ៉ាន់ ម៉ូនិច នៅតែមានសម្រស់ស្អាតផូរផង់ហើយ ការតែងខ្លួនក៏ស៊ីវិល័យទៅតាមជីវភាពរបស់នាងផងដែរ ។

គេចាំបានថា វ៉ាន់ ម៉ូនិច ធ្លាប់ជាតារាសម្តែងម្នាក់ដែលមានប្រជាប្រិយភាពគួរសម តែក្រោយពីជំពប់នូវរឿងអាស្រូវមកនាងក៏បានចាកចេញពីអាជីពនេះ ប៉ុន្តែលេចមុខជាថ្មី វ៉ាន់ ម៉ូនិច ក៏កាន់តែថ្កុំថ្កើង និង មានងារជាជំទាវ ធ្វើឱ្យមិត្តភក្តិរួមអាជីពស្រឡាំងកាំងមិនស្ទើរទេ ៕