ដាញ់ ម៉ូនីកា ជូនពរថ្ងៃកំណើតកូនស្រីយ៉ាងផ្អែមល្ហែម ស្ដែងពីក្ដីសុខក្នុងគ្រួសារពេញទំហឹង
អតីតតារាសម្ដែងធ្លាប់ទទួលបានប្រជាប្រិយភាពច្រើនផុសផុលពីសំណាក់ទស្សនិកជនអ្នកនាង ដាញ់ ម៉ូនីកា បានឃ្លាតកាយចាកឆ្ងាយពីវិស័យសិល្បៈអស់រយៈពេលជាង ១០ ឆ្នាំមកហើយ ពោលគឺចាប់តាំងពីអតីតតារាស្រីរូបនេះ បានក្រាបផ្ទឹមតាមប្រពៃណីជាមួយលោក ប៊ុន ថែល ដែលជាស្វាមីកាលពីកំឡុងចុងខែ កុម្ភៈ ឆ្នាំ ២០១០ មក នាងក៏សម្រេចចិត្តលាស្រុកកំណើតទៅរស់នៅជាមួយស្វាមីនៅលើទឹកដីប្រទេសអូស្រ្តាលី ។
តែយ៉ាងណា មួយរយៈចុងក្រោយនេះ ដាញ់ ម៉ូនីកា ចាប់ផ្ដើមមានទំនាក់ទំនងស្អិតល្មួតជាមួយអ្នកគាំទ្រឡើងវិញ បន្ទាប់ពីនាងរកស៊ីលក់ផលិតផល ក៏ដូចជាសម្លៀកបំពាក់នៅតាមអនឡាញ ។
ទន្ទឹមនឹងមុខរបររកស៊ីរបស់តារាស្រី ដាញ់ ម៉ូនីកា មហាជនក៏ចាប់អារម្មណ៍ខ្លាំងទៅលើជីវិតឯកជនរបស់នាង ដោយរយៈពេលរៀបការ ១០ ឆ្នាំមកនេះ តួឯកស្រីក្នុងរឿង «ទុំទាវ» ខាងលើ ទទួលបានចំណងដៃកូនស្រីម្នាក់ និង កូនប្រុសម្នាក់ រស់នៅជួបជុំស្វាមីយ៉ាងមានសុភមង្គល ។
ក្នុងឱកាសថ្ងៃកំណើតកូនស្រីច្បងថ្មីៗនេះ ដាញ់ ម៉ូនីកា ក៏បានជូនពរកូនស្រីពោរពេញដោយភាពផ្អែមល្ហែមបំផុតថា «រីករាយថ្ងៃកំណើតកូនស្រីសម្លាញ់ចិត្តម៉ាក់ និងប៉ា ជូនពរកូនរៀនពូកែ ជាកូនល្អរបស់ប៉ាម៉ាក់ និងជូនពរឱ្យកូនមានសុខភាពល្អ និងមានសំណាងពេញមួយជីវិត 12.01.2021» ៕