![ស៊ីន យូប៊ីន តារាស្រីទីមួយ បរិច្ចាគច្រើនជាងគេដល់ ១ ម៉ឺនដុល្លារជួយពលរដ្ឋរងគ្រោះដោយសារទឹកជំនន់](https://www.popular.com.kh/wp-content/uploads/2020/10/photo_2020-10-15_16-32-53.jpg)
ស៊ីន យូប៊ីន តារាស្រីទីមួយ បរិច្ចាគច្រើនជាងគេដល់ ១ ម៉ឺនដុល្លារជួយពលរដ្ឋរងគ្រោះដោយសារទឹកជំនន់
នៅថ្ងៃទី ១៥ ខែតុលា ២០២០ នេះកញ្ញា ស៊ីន យូប៊ីន តារាសម្ដែងស្រីដ៏ឆ្នើមកំពុងលេចធ្លោរនៅក្នុងប្រទេសកម្ពុជា បានបរិច្ចាគថវិកាផ្ទាល់ខ្លួន ចំនួន ១ ម៉ឺនដុល្លារ ជូនសម្ដេចតេជោ ហ៊ុន សែន នាយករដ្ឋមន្ត្រីនៃប្រទេសកម្ពុជា ដើម្បីជួយសង្គ្រោះប្រជាពលរដ្ឋកំពុងរងគ្រោះដោយសារទឹកជំនន់នៅស្ទើរទូទាំងប្រទេស ។ ការបរិច្ចាគថវិកាចំនួន ១ ម៉ឺនដុល្លារពីសំណាក់តារាសម្ដែង និងតារាភាពយន្តស្រីរូបនេះ អាចនិយាយបានថាជាចំនួនច្រើនជាងគេក្នុងចំណោលអ្នកសិល្បៈផ្សេងទៀត ដែលនេះបង្ហាញពីការជួយចែករំលែកក្នុងស្ថានភាពដែលប្រទេសជាតិកំពុងជួបនូវគ្រោះធម្មជាតិ ប្រជាជនត្រូវការជំនួយជាចាំបាច់បំផុត ។
ជាមួយគ្នានេះដែរ សម្ដេចតេជោ ហ៊ុន សែន ក៏បានអំពាវនាវសូមឱ្យប្រជាពលរដ្ឋ រក្សាសុវត្ថិភាពផ្ទាល់ខ្លួន ក្រុមគ្រួសារ ជាពិសេសប្រជាពលរដ្ឋដែលស្ថិតនៅតំបន់ដែលកំពុងរងគ្រោះដោយទឹកជំនន់ ត្រូវជម្លៀសរកទីទួលសុវត្ថិភាព ។
សម្ដេចក៏បានថ្លែងអំណរគុណដល់ក្រសួង ស្ថាប័ន អាជ្ញាធរពាក់ព័ន្ធគ្រប់ជាន់ថ្នាក់ ដែលបានយកចិត្តទុកដាក់សង្គ្រោះបងប្អូនប្រជាពលរដ្ឋបានទាន់ពេលវេលា និង សូមបន្តចាត់វិធានការចាំបាច់នានា និងដឹកនាំកម្លាំងក្នុងការចេញទៅជួយសង្គ្រោះប្រជាពលរដ្ឋ តាមភូមិសាស្ត្រ ដែលទទួលខុសត្រូវ ឱ្យបានទាន់ពេលវេលា ដើម្បីទប់ទល់នឹងគ្រោះ ទឹកជំនន់ ព្រមទាំងកាត់បន្ថយ ឱ្យបានជាអតិបរមានូវការលំបាកនិងផលប៉ះពាល់ដល់អាយុជីវិតប្រជាពលរដ្ឋ និងទ្រព្យសម្បត្តិនានា និង សូមអរគុណដល់សប្បុរសជននានាដែលបានចូលរួមឧបត្ថម្ភជួយដល់បងប្អូនប្រជាពលរដ្ឋដែលកំពុងទទួលរងគ្រោះដោយសារជំនន់ទឹកភ្លៀងនេះ ៕
![](https://1.bp.blogspot.com/-_VvJnWlEnyY/X4gT66uXH7I/AAAAAAAANm8/WJO-5D1WKYUHDzf8DE0iCVv0DuYHZHeTwCLcBGAsYHQ/s16000/34199280_1268133969984404_9036757296981475328_n.jpg)
![](https://1.bp.blogspot.com/-nUhyyQcgJxQ/X4gT6LR-cHI/AAAAAAAANm0/E046Z9o9WJ06PrCnL-AHiYAzZse8K-g2ACLcBGAsYHQ/s16000/121171019_2619417978350075_752273420924290587_o.jpg)
![](https://1.bp.blogspot.com/--kuLdTF3zTU/X4gT6JR4yTI/AAAAAAAANmw/cUFHDYhtTTAzJ1EKuLJE3G-LHdDY5DOHwCLcBGAsYHQ/s16000/121200425_2619418051683401_6033187902942157920_o.jpg)
![](https://1.bp.blogspot.com/-vLAeySDkNMc/X4gT636a_OI/AAAAAAAANnA/dkiIVFr4YA0xR5RxlG-R0YzAAa1YuZ_NwCLcBGAsYHQ/s16000/121236820_2619417911683415_7477402610938065099_o.jpg)