ក្មេងប្រុសម៉ាឡេស៊ីម្នាក់ កើតកា-មរោ-គទាំងវ័យទើប ១៦ ឆ្នាំ ក្រោយមិត្តភក្តិលួងលោមឱ្យចាយលុយ ១១ ដុល្លារសាករបស់ថ្មីនៅថៃ

ភាពសប្បាយរីករាយប្រែក្លាយជារឿងនាំទុក្ខដាក់ខ្លួន ដោយក្មេងប្រុសម្នាក់នៅប្រទេសម៉ាឡេស៊ីបានធ្វើដំណើរកម្សាន្តទៅលេងប្រទេសថៃជាមួយមិត្តភក្តិ ថែមទាំងសាករសជាតិថ្មីតាមមិត្តភក្តិណែនាំរហូតមកស្រុកកំណើតវិញនាំរោគឆ្លងមកជាមួយ ទោះចង់ស្ដាយក្រោយក៏ហួសពេល។

តាមការបង្ហោះពីគ្រូពេទ្យម៉ាឡេស៊ីម្នាក់លើបណ្ដាញសង្គមហ្វេសប៊ុកបានរៀបរាប់ឱ្យដឹងថា ក្មេងប្រុសខាងលើបានមកជួបលោកក្រោយគេកើតមានអាការហូរទឹករងៃ និង ខ្ទុះត្រង់ប្រដាប់ភេទរយៈពេលប្រមាណមួយសប្ដាហ៍។ ក្រោយស្ដាប់អាការហើយ លោកគ្រូពេទ្យក៏បាននិយាយប្រាប់ក្មេងប្រុសរូបនោះកុំឱ្យលាក់លៀមត្រូវនិយាយត្រង់ បើចង់ដឹងច្បាស់ពីជំងឺ និង ទទួលការព្យាបាលត្រឹមត្រូវ។

លោកគ្រូពេទ្យបានសួរទៅក្មេងប្រុសនោះថា៖ «ខ្ញុំជួយឯងមិនបានទេបើសិនជាឯងមិនប្រាប់ខ្ញុំតាមត្រង់។ ឯងមានបានរួមភេទជាមួយនរណាទេ?»។ ឱនក្បាលនិយាយទាំងអាម៉ាស់ ក្មេងប្រុសនោះក៏បានតបវិញថា៖ «ខ្ញុំបានទៅប្រទេសថៃកាលពីសប្ដាហ៍មុនជាមួយមិត្តភក្តិ ហើយពួកគេបាននិយាយថាពួកគេនឹងនាំខ្ញុំទៅសាកអ្វីថ្មី ហើយខ្ញុំក៏តាមគេទៅ»។

ដល់ត្រឹមនេះ លោកគ្រូពេទ្យក៏លែងបញ្ឆិតបញ្ឆៀងទៀតប្រាប់ត្រង់ទៅកាន់ក្មេងប្រុសនោះថា រូបគេគឺទំនងជាកើតជំងឺកាមរោគ (STD) ហើយ។ លោកក៏បានចេញថ្នាំឱ្យទៅក្មេងជាអ្នកជំងឺរូបនោះ ប៉ុន្តែខណៈកំពុងផ្សំថ្នាំនោះលោកក៏បានសួរទៅក្មេងប្រុសនោះទៀតថា គេចាយប្រាក់ប៉ុន្មានក្នុងការសាករបស់ថ្មីនោះ។ ក្មេងប្រុសតបវិញថា៖ «នាងសុំខ្ញុំ ៥០ រីងហ្គីត (ប្រមាណ ១១ ដុល្លារ)»។

គ្រូពេទ្យដកដង្ហើមធំរួចនិយាយពាក្យពេចន៍ណែនាំមួយចំនួនទៅកាន់ក្មេងប្រុសជាអ្នកជំងឺថា ការសេពគប់មិត្តភក្តិគឺសំខាន់ណាស់ ផ្លូវដើរនៅវែងឆ្ងាយ តែបែរជាមកកើតជំងឺកាមរោគទាំងវ័យក្មេងបែបនេះ។

គួរបញ្ជាក់ថា អាការហូរទឹករងៃនៅត្រង់ប្រដាប់ភេទអាចបណ្ដាលមកពីការឆ្លងរោគនៅផ្លូវបង្ហួរនោម (UTI) ឬ ប្រភេទជំងឺកាមរោគ (STD) ដូចជា syphilis, gonorrhea និង trichomoniasis។ ប្រភេទជំងឺកាមរោគខ្លះអាចព្យាបាលបានដោយថ្នាំ ប៉ុន្តែប្រសិនបើទុកយូរមិនទទួលការព្យាបាលទាន់ពេល វាអាចវិវដ្តទៅជាជំងឺអេដស៍៕