នៅថ្ងៃទី ១១ ខែសីហា ឆ្នាំ ២០២៥ នេះ សារព័ត៌មានអន្តរជាតិមួយបានចេញផ្សាយថា លោកសាស្ត្រាចារ្យ Zhang Zhiqiang នៃមហាវិទ្យាល័យបច្ចេកវិទ្យា Nanyang បានស្រាវជ្រាវ និង បង្កើតបានរ៉ូបូតប្រភេទថ្មីដំបូងលើពិភពលោកដែលអាចពពោះបានដូចមនុស្ស។ បច្ចេកវិទ្យាទំនើបថ្មីមួយនេះដែរ រំពឹងថានឹងដាក់ចេញលក់លើទីផ្សារនៅចន្លោះឆ្នាំ ២០២៦ ខាងមុខនេះ ជាមួយនឹងតម្លៃមិនលើស ១០ ម៉ឺនយ័ន (ប្រមាណ ១៣ ៩២៤ ដុល្លារ)។
ព័ត៌មានដ៏ក្ដៅគគុកមួយនេះដែរ បានផ្ទុះការចាប់អារម្មណ៍ខ្លាំងលើបណ្ដាញសង្គម Weibo ចិន ដោយប្រធានបទ «ពិភពលោកជិតមានរ៉ូបូតពពោះដំបូងគេ» ហក់ឡើងលើកំពូលកន្លែង search ទាក់ទាញអ្នកលេងបណ្ដាញសង្គមនេះចូលមើលជាង ៨០ លានដង។ គួរបញ្ជាក់ថា ខុសពីវិធីសាស្ត្របង្កកំណើតក្រៅស្បូន ឬជួលឱ្យមានអ្នកពពោះជំនួស បច្ចេកវិទ្យាថ្មីនេះគឺបង្កើតឡើងមានផ្នែកស្បូនបំពាក់ក្នុងពោះរ៉ូបូតដែលមានរូបរាងដូចជាមនុស្ស ហើយអ្វីដែលអស្ចារ្យមិននឹកស្មាននោះគឺរ៉ូបូតដែលដើរតួនាទីជាម្ដាយនេះ គឺមានដំណើរការពពោះរហូតដល់សម្រាលកូនប្រៀបដូចជាមនុស្សពិតៗដូច្នោះដែរ។
លោកសាស្ត្រាចារ្យ Zhang បានលើកឡើងពីគោលបំណងនៃការបង្កើតរ៉ូបូតថ្មីនេះថា លោកចង់បំពេញតម្រូវការរបស់ក្រុមមនុស្សវ័យក្មេងដែលមិនចង់ពពោះ តែចង់បានកូន។ គួរឱ្យដឹងថា បច្ចុប្បន្នបច្ចេកវិទ្យាស្បូនសិប្បនិម្មិតនៅស្ថិតក្នុងដំណាក់កាលចិញ្ចឹមក្នុងកែវដោយឥលូវដាក់បញ្ចូលក្នុងពោះរបស់រ៉ូបូត ហើយលោក Zhang ប៉ាន់ប្រមាណថារ៉ូបូតថ្មីនេះនឹងបញ្ចប់ការផលិតឆាប់ៗ ដើម្បីដាក់លក់លើទីផ្សារ៕
ប្រភព៖ Kenh14
