កាលពីថ្ងៃទី ០៩ ខែមិថុនា ឆ្នាំ ២០២៥ កន្លងទៅ សារព័ត៌មានចិន Sohu បានចេញផ្សាយ មេធាវីម្នាក់នៅក្រុងប៉េកាំង ប្រទេសចិន បានទម្លាយថា ម្ដាយរបស់តារាប្រុស Kris Wu បច្ចុប្បន្នកំពុងត្រូវជាប់ឃុំដូចគ្នាជាមួយកូនប្រុសរបស់ខ្លួន ខណៈការជាប់ឃុំរបស់ Kris Wu ត្រូវបានបន្លាយថែមទៀត។
តាមការឱ្យដឹង នៅពេល Kris Wu សកម្មក្នុងវិស័យសិល្បៈ ម្ដាយរបស់លោក Wu Xiuqin គឺជាប្រធានការិយាល័យ ជាអ្នកគ្រប់គ្រងទូទៅនៃការងាររបស់លោក។ អំឡុងពេលនោះ លោកស្រី Wu Xiuqin បានធ្វើការក្លែងបន្លំពន្ធក្នុងចំនួនទឹកប្រាក់ ៣០០ លានយ័ន (ប្រមាណជាង ៤១.៧ លានដុល្លារ)។ ក្រោយករណីរំលោភរបស់ Kris Wu ត្រូវបានដោះស្រាយរួចរាល់ ក្រុមហ៊ុនរបស់លោកក៏ត្រូវបានគេស៊ើបអង្កេត ហើយព័ត៌មានពាក់ព័ន្ធក៏ត្រូវបានទម្លាយជាបណ្ដើរៗ។ ទីបំផុត បុគ្គលសំខាន់ដែលរ៉ាប់រងក្រុមហ៊ុនរបស់ Kris Wu លោកស្រី Wu Xiuqin ក៏ត្រូវបានជាប់ឃុំដូចជាកូនប្រុសរបស់ខ្លួនដែរ។
ងាកមក Kris Wu វិញ បើតាមការិយាល័យអធិការកិច្ចទីពីរនៃការិយាល័យពន្ធក្រុងប៉េកាំង ស្របតាមច្បាប់ និង បទប្បញ្ញត្តិពាក់ព័ន្ធ បានបញ្ជាឱ្យ Kris Wu បង់ពន្ធវិញ និង បង់ថ្លៃសេវាយឺតយាវ ដោយសរុបទាំងអស់ ៦០០ លានយ័ន (ប្រមាណជាង ៨៣.៣ លានដុល្លារ)។ យ៉ាងណាមិញ Kris Wu គឺមិនអាចបង់បាន ដូច្នេះពេលវេលាជាប់ឃុំរបស់លោកនឹងត្រូវបន្លាយពេលបន្ថែម។
តាមរបាយការណ៍ Kris Wu នឹងត្រូវនិរទេសទៅប្រទេសកាណាដា ក្រោយបញ្ចប់ការឃុំឃាំងរយៈពេលជាង ១៣ ឆ្នាំនៅប្រទេសចិន។ Kris Wu ក៏ប្រឈមនឹងបញ្ហាច្បាប់ដាច់ដោយឡែកមួយផ្សេងទៀតនៅប្រទេសកាណាដា ដែលលោកអាចនឹងទទួលការកាត់ទោសពីបទរំលោភផ្លូវភេទពាក់ព័ន្ធនឹងអនីតិជន ដោយការដាក់ទោសអាចឈានដល់ការចាក់ថ្នាំគ្រៀវ chemical castration ក្រោមច្បាប់របស់ប្រទេសកាណាដា៕
ប្រភព៖ Kenh14
