ក្រដាសមិនអាចខ្ចប់ភ្លើង! ថៃទទួលស្គាល់ថាបានប្រើសារធាតុគីមី «ផូស្វ័រពណ៌ស» បា./ញ់លើកងទ័ពកម្ពុជាមែន តែនៅឆ្លើយយករួចខ្លួនចំណុចមួយ

នៅថ្ងៃទី ១៩ ខែសីហា ឆ្នាំ ២០២៥ នេះ សារព័ត៌មាន Thai Enquirer បានចេញផ្សាយថា កងទ័ពថៃទទួលស្គាល់ថាពួកគេពិតជាបានប្រើប្រាស់សារធាតុគីមី «ផូស្វ័រពណ៌ស» (white phosphorus) បាញ់មកលើកងទ័ពកម្ពុជា ក្នុងការប្រយុទ្ធរយៈពេល ៥ ថ្ងៃ (ចាប់ពីថ្ងៃទី ២៤ ខែកក្កដា-ថ្ងៃទី ២៨ ខែកក្កដា)។

យ៉ាងណាមិញ តាមការរៀបរាប់ចេញពីអ្នកនាំពាក្យកងទ័ពជើងគោកថៃ លោក Maj Gen Winthai Suvaree គឺនៅមាត់រឹងនិយាយយកត្រូវឱ្យខ្លួនឯងថា សារធាតុផូស្វ័រពណ៌សដែលបាញ់មកលើកងទ័ពខ្មែរនោះមិនមែនជាអាវុធគីមីឡើយ ហើយការកាន់កាប់ និង ប្រើប្រាស់សារធាតុផូស្វ័រពណ៌សនេះដែរ គឺគោរពស្របតាមច្បាប់អន្តរជាតិ គ្រប់គ្រងបានយ៉ាងតឹងរ៉ឹង និង ប្រកាន់ខ្ជាប់នូវគោលការណ៍មនុស្សធម៌។

លោក Winthai បានបញ្ជាក់ថា ក្រោមអនុសញ្ញាស្ដីពីអាវុធធម្មតាមួយចំនួន (CCW), Protocol III បានហាមប្រាមមិនឱ្យប្រើប្រាស់អាវុធបញ្ឆេះ ជាពិសេសអាវុធដែលដុតសម្លាប់មនុស្សដោយផ្ទាល់ ប៉ុន្តែសារធាតុផូស្វ័រពណ៌សដែលប្រើមកលើកងទ័ពកម្ពុជានេះ អ្នកនាំពាក្យរូបនេះថាមិនស្ថិតក្នុងក្រុមអាវុធដែលកំណត់នោះឡើយ។ រូបលោកថែមទាំងសង្កត់បន្ថែមទៀតថា កងទ័ពថៃប្រើប្រាស់ផូស្វ័រពណ៌សដោយគ្រប់គ្រងយ៉ាងតឹងរ៉ឹងបំផុត កំណត់ទៅតែគោលដៅទ័ព និង មិនប្រើចំទៅលើពលរដ្ឋនោះឡើយ៕

ប្រភព៖ Thai Enquirer