កាលពីថ្ងៃទី ២៣ ខែមករា ឆ្នាំ ២០២៥ កន្លងទៅ (ពេលវេលាក្នុងតំបន់) ភ្លើងឆេះព្រៃថ្មីមួយផ្សេងទៀតហើយហៅថា Sepulveda Fire បានឆាបឆេះឡើងនៅជិត Interstate 405 និង មហាវិថី Sepulveda នាក្រុង Los Angeles រដ្ឋ California សហរដ្ឋអាមេរិក ដោយភ្លើងឆេះព្រៃថ្មីនេះផងដែរកើតមានឡើងត្រឹមប៉ុន្មានម៉ោងក្រោយក្រុមពន្លត់អគ្គិភ័យកំពុងធ្វើការពន្លត់ភ្លើង Hughes Fire ដែលរាលដាលឆេះខ្លាំងតាំងពីរសៀលថ្ងៃទី ២២ ខែមករា ឆ្នាំ ២០២៥ កន្លងទៅ។
ពេលភ្លើងផ្ដើមឆេះភ្លាមៗ សេចក្ដីប្រកាសឱ្យជម្លៀសខ្លួនដល់ពលរដ្ឋមួយចំនួននៅតំបន់ Sherman Oaks ត្រូវបានធ្វើឡើង ប៉ុន្តែក្រោយមកក៏ត្រូវបានដកចេញវិញ។ យ៉ាងណាមិញ ផ្សែងខ្មួលខ្មាញ់នៅតែមើលឃើញនៅជិតតំបន់មួយចំនួនរួមមាន បរិវេណ UCLA និង Mount Saint Mary’s University-Los Angeles ជាដើម។
គួរឱ្យដឹងថា ភ្លើងឆេះ Sepulveda Fire បានដុតបំផ្លាញផ្ទៃដីប្រមាណ ៤០ ហិកតា នេះបើតាមការបញ្ជាក់ពីនាយកដ្ឋានពន្លត់អគ្គិភ័យប្រចាំក្រុង Los Angeles។ ពេញមួយព្រឹក ក្រុមពន្លត់អគ្គិភ័យនៅតែឈរជើងតាមទីតាំងដែលឆេះដើម្បីធ្វើការពន្លត់ទីតាំងណាដែលមិនទាន់រលត់អស់។
គិតមកទល់ពេលនេះ ភ្លើងឆេះព្រៃនៅតែមានសភាពខ្លាំងក្លាមិនទាន់ថមថយនៅឡើយនៅ Los Angeles និង Ventura ដោយបានបំផ្លាញផ្ទៃដីប្រមាណជាង ១ ម៉ឺនហិកតា និង ត្រឹម ១៤% ប៉ុណ្ណោះអាចគ្រប់គ្រងបានគិតត្រឹមព្រឹកថ្ងៃទី ២៣ ខែមករា ឆ្នាំ ២០២៤ កន្លងទៅ (ពេលវេលាក្នុងតំបន់) នេះបើតាមការបញ្ជាក់ពីនាយកដ្ឋានការពារព្រៃឈើ និង អគ្គិភ័យប្រចាំរដ្ឋ California៕
