កាលពីថ្ងៃថ្ងៃទី ២៨ ខែមីនា ឆ្នាំ ២០២៥ នេះ មានគ្រោះរញ្ជួយដីកម្រិត ៧.៧ រ៉ិចទ័រមួយបានវាយប្រហារភាគកណ្ដាលប្រទេសមីយ៉ាន់ម៉ា បង្កឱ្យអគារជាច្រើនរញ្ជួយផ្អៀងដួលរលំ រួមទាំងប៉ះពាល់ដល់បណ្ដាប្រទេសជិតខាងមួយចំនួនទៀតដូចជាប្រទេសថៃ ជាដើម។
តាមទិន្នន័យពីខាងទីភ្នាក់ងារស្ទាបស្ទង់ភូមិសាស្ត្រអាមេរិក (USGS) បានឱ្យដឹងថា គ្រោះរញ្ជួយដីនេះបានកើតឡើងនៅរយៈចម្ងាយ ១៦ គីឡូម៉ែត្រភាគពាយព្យក្រុង Sagaing ភាគកណ្ដាលប្រទេសមីយ៉ាន់ម៉ា ក្នុងជម្រៅ ១០ គីឡូម៉ែត្រនាវេលាម៉ោង ១២ និង ៥០ នាទីថ្ងៃត្រង់ ថ្ងៃទី ២៨ ខែមីនា ឆ្នាំ ២០២៥ នេះ។ តាមការផ្ដល់ព័ត៌មានពីភ្នាក់ងារ AFP នាទីក្រុង Naypyidaw បានបញ្ជាក់ថា ដងផ្លូវជាច្រើនបានរងការខូចខាត ខណៈអគារមួយចំនួនទៀតបានផ្អៀងដួលរលំ។
យោងតាមទីភ្នាក់ងារដដែលបានរាយការណ៍ឱ្យដឹងទៀតថា ក្រោយពីគ្រោះរញ្ជួយដីលើកទី ១ កម្រិតធ្ងន់ ៧.៧ រ៉ិចទ័រហើយនោះ ប្រទេសមីយ៉ាន់ម៉ាក៏រងការរញ្ជួយដីក្នុងកម្រិតផ្សេងៗជាបន្តបន្ទាប់ចំនួន ៧ ដងទៀតផងដែររួមមាន៖
លើកទី ១៖ វេលាម៉ោង ១៣ និង ៣២ នាទី (រញ្ជួយក្នុងកម្រិត ៧.១ រ៉ិចទ័រ)
លើកទី ២៖ វេលាម៉ោង ១៣ និង ៤៥ នាទី (រញ្ជួយដីក្នុងកម្រិត ៥.៥ រ៉ិចទ័រ)
លើកទី ៣៖ វេលាម៉ោង ១៤ និង ២៤ នាទី (រញ្ជួយក្នុងកម្រិត ៤.០ រ៉ិចទ័រ)
លើកទី ៤៖ វេលាម៉ោង ១៤ និង ៣៧ នាទី (រញ្ជួយក្នុងកម្រិត ៥.២ រ៉ិចទ័រ)
លើកទី ៥៖ វេលាម៉ោង ១៤ និង ៤២ នាទី (រញ្ជួយក្នុងកម្រិត ៣.៩ រ៉ិចទ័រ០
លើកទី ៦៖ វេលាម៉ោង ១៤ និង ៥៧ នាទី (រញ្ជួយក្នុងកម្រិត ៤.៧ រ៉ិចទ័រ)
លើកទី ៧៖ វេលាម៉ោង ១៥ និង ២១ នាទី (រញ្ជួយក្នុងកម្រិត ៤.០ រ៉ិចទ័រ)
