ថ្មីៗនេះ សារព័ត៌មាន Daily Mail បានចេញផ្សាយករណីរបស់ក្មេងប្រុសម្នាក់នៅប្រទេសប្រេស៊ីល ដោយរូបគេបានធ្វើការលេង challenge តាមអនឡាញ ដោយចាក់សារធាតុចម្លែកចូលក្នុងខ្លួន តែការលេងសើចនេះបែរជាបានឆក់យកអាយុជីវិតគេទាំងក្មេងវ័យត្រឹមរយៈពេល ៧ ថ្ងៃ។
តាមព័ត៌មានបានឱ្យដឹងថា ក្មេងប្រុសខាងលើមានឈ្មោះ Davi Moreira អាយុត្រឹម ១៤ ឆ្នាំ បានបាត់បង់ជីវិតទៅកាលពីថ្ងៃទី ១៣ ខែកុម្ភៈ ឆ្នាំ ២០២៥ កន្លងទៅ។ ក្មេងប្រុស Moreira ត្រូវបានគេជឿថាបានលេងតាម challenge អនឡាញមួយដោយធ្វើការកិនសត្វមេអំបៅលាយជាមួយទឹក រួចយកមកចាក់បញ្ចូលក្នុងខ្លួន។ យ៉ាងណាមិញ ក្រោយចាក់រួច Moreira បានចាប់ផ្ដើមក្អួតរហូតខ្លួនឯងឈរលែងជាប់។ ដំបូងឡើយ រូបគេមិនហ៊ានប្រាប់ការពិតដល់ក្រុមគ្រួសារនោះឡើយដោយកុហកថាជើងរបស់គេឈឺព្រោះដួល តែពេលស្ថានភាពកាន់តែធ្ងន់ធ្ងរមែនទែន ទើបគេព្រមសារភាពគ្រប់យ៉ាងប្រាប់ក្រុមគ្រួសារ។
Moreira ត្រូវបានក្រុមគ្រួសារបញ្ជូនទៅមន្ទីរពេទ្យព្យាបាល ប៉ុន្តែជាអកុសលដោយស្ថានភាពធ្ងន់ធ្ងរពេករូបគេក៏បានស្លាប់ក្រោយទទួលការព្យាបាលបាន ៧ ថ្ងៃ។ ប៉ូលិសកំពុងបើកការស៊ើបអង្កេតលើករណីមួយនេះ ហើយខាងអ្នកជំនាញក៏បានធ្វើកោសល្យវិច័យលើសពជនរងគ្រោះផងដែរ ប៉ុន្តែលទ្ធផលយ៉ាងណានៅមិនទាន់បានបញ្ជាក់នៅឡើយទេ។
ជាមួយគ្នានោះ បើតាមអ្នកជំនាញផ្នែកវេជ្ជសាស្ត្រម្នាក់ឈ្មោះ Luiz Relvas ដែលធ្វើការនៅមន្ទីរពេទ្យ Santa Marcelina បានលើកឡើងថា Moreira អាចស្លាប់ដោយសារការកកស្ទះសរសៃឈាម ការឆ្លងរោគ ឬប្រតិកម្មអាឡែកហ្ស៊ី។ អ្នកជំនាញបានរៀបរាប់ថា៖ «ពួកយើងមិនដឹងថាសារធាតុដែលក្មេងប្រុសចាក់ចូលខ្លួននោះជាសារធាតុអ្វីឡើយ ហើយក៏មិនដឹងថាគេចាក់ក្នុងបរិមាណប៉ុន្មានដែរ។ វាអាចថាខ្យល់ចូលដែលបង្កទៅជាការកកស្ទះសរសៃឈាម»។
ករណីមួយនេះដែរ កំពុងតែបង្កជាការព្រួយបារម្ភខ្លាំងជុំវិញការលេង challenge តាមអនឡាញពីសំណាក់ក្មេងៗ។ ជាក់ស្ដែង កាលពីឆ្នាំទៅក៏មានមួយករណីដែរ ដោយតារាតាមបណ្ដាញសង្គមម្នាក់ឈ្មោះ Thammy MC សឹងតែត្រូវកាត់ជើងចោល ក្រោយនាងលេង challenge យកជើងទៅត្រាំក្នុងទឹកកក៕
