ថៃ ប្រកាសវិធានការពិនិត្យកាតវ៉ាក់សាំងកូវីដ-១៩ ឡើងវិញ ចំពោះភ្ញៀវទេសចរចូលស្រុក
ប្រទេសថៃ នឹងតម្រូវឱ្យអ្នកទេសចរក្រៅស្រុក បង្ហាញកាត ឬ លិខិតបញ្ជាក់ពីការចាក់វ៉ាក់សាំងកូវីដ-១៩ គ្រប់ចំនួន មុនពេលហោះហើរចូលប្រទេសថៃ នេះបើតាមការបញ្ជាក់ពីខាងនិយតករអាកាសចរណ៍ក្នុងប្រទេស។ ការប្រកាសវិធានការថ្មីនេះដែរ គឺធ្វើឡើងដើម្បីត្រៀមខ្លួនទទួលភ្ញៀវទេសចរបន្ថែម ខណៈប្រទេសចិន បានបើកច្រកព្រំដែនរបស់ខ្លួនកាលពីថ្ងៃទី ០៨ ខែមករា ឆ្នាំ ២០២៣ កន្លងទៅនេះ។
បើតាមអាជ្ញាធរអាកាសចរណ៍ស៊ីវិលនៃប្រទេសថៃ (CAAT) បានបញ្ជាក់ក្នុងសេចក្ដីប្រកាសកាលពីថ្ងៃទី ០៧ ខែមករា ឆ្នាំ ២០២៣ ថា ចាប់ពីថ្ងៃទី ០៩ ខែមករា ឆ្នាំ ២០២៣ នេះតទៅ រាល់ភ្ញៀវទេសចរបរទេសទាំងអស់ដែលធ្វើដំណើរចូលប្រទេសថៃ នឹងត្រូវបង្ហាញកាតវ៉ាក់សាំង ឬ អ្នកដែលបានឆ្លងកូវីដ-១៩ ត្រូវមានក្រដាសបញ្ជាក់ពីការជាសះស្បើយពីជំងឺកូវីដ-១៩ បាន ៦ ខែ។
ដោយឡែកចំពោះភ្ញៀវទេសចរដែលមិនបានចាក់វ៉ាក់សាំងការពារ គឺត្រូវបង្ហាញពីលិខិតបញ្ជាក់ពីពេទ្យ ដែលពន្យល់បញ្ជាក់ពីមូលហេតុដែលពួកគេមិនបានទទួលការចាក់វ៉ាក់សាំង។ ខាង CAAT បានបន្ថែមទៀតថា ខាងក្រុមហ៊ុនអាកាសចរណ៍ទាំងអស់ នឹងត្រូវទទួលខុសត្រូវលើការពិនិត្យមើលឯកសារទាំងនោះ មុនពេលអ្នកដំណើរឡើងយន្តហោះ ហើយត្រូវបញ្ចេញបញ្ជីនៃចំនួនដូសវ៉ាក់សាំងដែលតម្រូវតាមប្រភេទនៃវ៉ាក់សាំងកូវីដ-១៩ (យ៉ាងហោចណាស់ ២ ដូសឡើងទៅ) លើវិបសាយរបស់ពួកគេផងដែរ។ វិធានការថ្មីនេះដែរ នឹងត្រូវអនុវត្តយ៉ាងហោចណាស់ដល់ចុងខែមករា នេះ។
គួរបញ្ជាក់ផងដែរថា វិធានការទាមទារពិនិត្យកាតវ៉ាក់សាំងកូវីដ-១៩ ក្នុងប្រទេសថៃ ត្រូវបានលុបចោលម្ដងហើយកាលពីខែតុលា ឆ្នាំ ២០២២ កន្លងទៅ ប៉ុន្តែត្រូវបានប្រកាសអនុវត្តឡើងវិញ ក្រោយប្រទេសចិន បានបើកច្រកព្រំដែនរបស់គេវិញនោះ៕
ប្រភព៖ CNA
