ស្ងាត់ជិត ២ ឆ្នាំ ឥឡូវក្រុងវ៉ូហាន ចេញវិធានការការពារជាថ្មី ក្រោយរកឃើញអ្នកឆ្លងកូវីដក្នុងសហគមន៍
អាជ្ញាធរទីក្រុងវ៉ូហាន ប្រទេសចិន បានចេញវិធានការផ្អាកសកម្មភាពមួយចំនួនក្នុងស្រុក Jiangxia ក្រោយរកឃើញករណីឆ្លងកូវីដ-១៩ ជាថ្មីក្នុងសហគមន៍ ក្រោយស្ងប់ស្ងាត់អស់រយៈពេលជិត ២ ឆ្នាំមកនេះ។
វិធានការរឹតបន្តឹងឡើងវិញនេះដែរ មានដូចជា ហាមមិនឱ្យមានការប្រមូលផ្ដុំជួបជុំទ្រង់ទ្រាយធំ នៅតាមភោជនីយដ្ឋាន ឬ អាហារដ្ឋាននានា ក៏ដូចជាការផ្អាកដំណើរការកន្លែងកម្សាន្តតាមទីសាធារណៈនានាផងដែរ។ បន្ថែមពីនេះ ចំពោះមធ្យោបាយសាធារណៈផ្សេងៗដូចជា រថយន្តក្រុង ឬ រថភ្លើងក្រោមដីជាដើម ក៏ត្រូវបានផ្អាកដំណើរការដូចគ្នា។
ក្នុងនោះដែរ អាជ្ញាធរក្នុងតំបន់ ក៏បានជំរុញឱ្យពលរដ្ឋស្រុក Jiangxia កុំចាកចេញពីកន្លែងរស់នៅរបស់ពួកគេ អំឡុងពេលដាក់ចេញវិធានការរឹតបន្តឹងរយៈពេល ៣ ថ្ងៃ គិតចាប់ពីថ្ងៃនេះទៅ រួមទាំងប្រកាសដល់ពលរដ្ឋពីតំបន់ផ្សេងៗទៀត ចៀសវាងធ្វើដំណើរចូលក្នុងក្រុងវ៉ូហាន មួយរយៈនេះ។
គួរបញ្ជាក់ថា វិធានការរឹតបន្តឹងទប់ស្កាត់ការរាលដាលឆ្លងកូវីដ-១៩ នេះដែរ ត្រូវបានធ្វើឡើង ក្រោយមន្ត្រីសុខាភិបាលក្នុងស្រុកនោះ ប្រកាសរកឃើញអ្នកឆ្លងកូវីដ-១៩ ក្នុងសហគមន៍ចំនួន ២ ករណី និង ២ ករណីទៀតរកឃើញ ក្រោយប៉ះពាល់អ្នកឆ្លង៕
