ឱ្យតែដល់ពិធីបុណ្យចូលឆ្នាំម្តងៗ បណ្ដាប្រទេសមួយចំនួនដូចជាចិន វៀតណាម និង សូម្បីតែខ្មែរយើងជាដើម តែងតែឃើញថាមានការឡកម៉ុងសាយស្ទើរតែគ្រប់ទីកន្លែង មានទាំងនៅក្នុងផ្ទះ មានទាំងនៅតាមផ្លូវ ពោលការឡកម៉ុងសាយ គឺអត្តសញ្ញាណមួយដែលត្រូវបានមនុស្សនឹកឃើញ និង ចងចាំសម្រាប់ពិធីចូលឆ្នាំចិនតែម្តង។
តើការឡកម៉ុងសាយនេះ មានប្រវត្តិយ៉ាងណាខ្លះទៅ?
ការឡកម៉ុងសាយ ត្រូវបានគេដឹងថាមានកំណើតតាំងពីក្នុងរាជរង្សហាន នៅក្នុងអំឡុង ២០៦ ឆ្នាំមុនគ្រិស្តសករាជ ដល់ ២២០ ឆ្នាំនៃគ្រិស្តសករាជ។ ពេលនោះ ការឡក ឬ លោតម៉ុងសាយនេះ គឺសម្រាប់តែការបួងសួងគោរពដល់ដូនតា និង បួងសួងសុំទឹកភ្លៀងប៉ុណ្ណោះ តែក្រោយមក ខណៈដល់រាជវង្សថាង និង រាជវង្សសុង ការលោតនេះក៏បានក្លាយទៅជាសកម្មភាពកម្សាន្តជាធម្មតា ជាពិសេសគឺសម្រាប់ពិធីបុណ្យចូលឆ្នាំចិននេះឯង។
ដោយឡែក មានព្រេងកថាច្រើនណាស់នៅពីក្រោយប្រវត្តិការឡកម៉ុងសាយនេះ តែមានព្រេងកថាមួយគួរឱ្យចាប់អារម្មណ៍ជាងគេ។ ក្នុងនោះ មានដំណាលមួយថាមានភូមិមួយនៅជិតភ្នំនៃភាគខាងត្បូងប្រទេសចិន ជារៀងរាល់ឆ្នាំ ភូមិនេះតែងតែមានសត្វចម្លែកមួយក្បាលដែលមានភ្នែកមួយស្នែងមួយ ចុះពីលើភ្នំមកបង្កភាពភ័យខ្លាចដល់អ្នកស្រុក ជាពិសេសគឺវាស៊ីដំណាំស្ទើរទាំងអស់តែម្តង។ អ្នកភូមិក៏បានដាក់ឈ្មោះសត្វចម្លែកនោះថា Nian Shou (年獸) ដែលមានន័យជាភាសាខ្មែរថា សត្វចម្លែកប្រចាំឆ្នាំ។
យ៉ាងណាមិញ អ្នកភូមិមិនដឹងពីវិធីបង្រ្កាបសត្វចម្លែកមួយក្បាលនេះទេ ម្នាក់ៗអស់សង្ឃឹមណាស់ព្រោះត្រូវរស់ក្នុងភាពភ័យខ្លាចជារៀងរាល់ថ្ងៃ។ យ៉ាងណាមិញ មានថ្ងៃមួយស្រាប់តែមានអ្នកដំណើរម្នាក់បានដើរកាត់ភូមិ ព្រមទាំងបានប្រាប់ថា សត្វចម្លែកនោះវាខ្លាចភ្លើងខ្លាចសំឡេងខ្លាំងៗ និង ពណ៌ក្រហម។ គ្រាន់តែដឹងហើយ អ្នកភូមិក៏បានច្នៃដើមឫស្សីជាមួយនឹងក្រណាត់ពណ៌ក្រហមឱ្យទៅជាគ្រោងរូបសត្វ (ដូចម៉ុងសាយ) ដើម្បីឱ្យមនុស្សពីរនាក់អាចនៅក្នុងនោះបាន។
នៅឆ្នាំក្រោយ ពេលដែលសត្វចម្លែក Nian បង្ហាញខ្លួន អ្នកភូមិបានមករៀបចំឱ្យមនុស្សពីរនាក់ពាក់រូបគ្រោងសត្វដែលបានរៀបចំនោះទៅលោតបន្លាចសត្វចម្លែកនោះ ឯអ្នកស្រុកដទៃទៀតក៏បាននាំគ្នាវាយចានវាយឆ្នាំងឱ្យកើតសំឡេងឮៗ ព្រមទាំងបានដុតផាវថែមទៀតផង។ ជាលទ្ធផលបានដូចចិត្ត អ្នកភូមិក៏បានដេញសត្វចម្លែក Nian បានដោយជោគជ័យ ហើយក្រោយមកដើម្បីរំឮកដល់ជ័យជម្នះនេះ ពលរដ្ឋចិនក៏បានតែងតែពាក់ឈុតគ្រោងសត្វបច្ចុប្បន្នជាម៉ុងសាយនេះឯង ដើម្បីឡកអបអររៀងរាល់ឆ្នាំថ្មី៕
