អំពិលអំពែក ជាសត្វល្អិតមួយប្រភេទដែលតែងតែបញ្ចេញពន្លឺភ្លឹបភ្លែតៗបង្អួតរូបរាងនៅពេលយប់។ យ៉ាងណាមិញ មនុស្សជាច្រើនគឺតែងតែឆ្ងល់ថា តើសត្វល្អិតប្រភេទនេះ មានអគ្គិសនីក្នុងខ្លួនឬ ទើបអាចបញ្ចេញពន្លឺភ្លឺដូចអំពូលបែបនេះ?
ចម្លើយនោះគឺថា «អត់ទេ» ព្រោះអំពិលអំពែកគឺគ្មានអគ្គិសនីអ្វីក្នុងខ្លួនឱ្យវាបញ្ចេញពន្លឺបានបែបនេះឡើយ។ បើយោងតាមវិបសាយបរទេសមួយចំនួនបានពន្យល់បញ្ជាក់ពីការដែលអំពិលអំពែកអាចបញ្ចេញពន្លឺពីក្នុងពោះបានបែបនេះ គឺដោយសារតែអំពិលអំពែកប្រើប្រាស់ប្រតិកម្មគីមីពិសេសមួយដែលអាចឱ្យពួកវាបង្កើតបានជាពន្លឺក្នុងខ្លួន។ ប្រតិកម្មគីមីនោះដែរគឺរួមផ្សំជាមួយប្រូតេអ៊ីន Luciferin អុកស៊ីហ្សែន កាល់ស្យូម និង ម៉ូលេគុល ATP ដែលជាលទ្ធផលធ្វើឱ្យខ្លួនសត្វល្អិតប្រភេទនេះអាចបញ្ចេញពន្លឺភ្លឺបាន។
គួរបញ្ជាក់ដែរថា មិនមែនមានតែអំពិលអំពែកទេដែលអាចបញ្ចេញពន្លឺបាននោះ ជាក់ស្ដែងដូចជាពពួកប្លង់តុងក្នុងសមុទ្រ ឬប្រភេទសត្វមួយចំនួនទៀតក៏អាចបញ្ចេញពន្លឺបានក្នុងលំនាំស្រដៀងគ្នានេះដែរ ដោយលំនាំប្រតិកម្មបញ្ចេញពន្លឺរបស់សត្វនេះដែរត្រូវបានគេហៅថា bioluminescence៕
