Ania Od Przytulania ជាកន្លែងបម្រើសេវាកម្មឱបដ៏ជំនាញមួយកន្លែងស្ថិតនៅទីក្រុង Katowice ភាគខាងត្បូងប្រទេសប៉ូឡូញ។ សេវាកម្មនេះ បង្កើតឡើងកាលពីឆ្នាំ ២០២៣ កន្លងទៅដោយនារីម្នាក់ឈ្មោះ Aleksandra Kasperek ដោយតាមឱ្យដឹង ដើម្បីអាចទទួលសេវាកម្មឱបរយៈពេលមួយម៉ោង អតិថិជនទាំងអស់តម្រូវឱ្យមានការកក់មុនមួយសប្ដាហ៍ក្នុងតម្លៃ ៣៧ ដុល្លារ។
តាមការលើកឡើងរបស់ម្ចាស់សេវាកម្មខាងលើបានរៀបរាប់ថា៖ «ពេលខ្លះមនុស្សយើងគ្រាន់តែត្រូវការឱបដើម្បីឱ្យខ្លួនឯងមានអារម្មណ៍ធូរស្រាលជាងមុន ប៉ុន្តែខ្ញុំមិនរំពឹងសោះឡើយថាមានមនុស្សយ៉ាងច្រើនចាប់អារម្មណ៍លើសេវាកម្មមួយនេះ»។
នាងបានឱ្យដឹងថា ការឱបជួយព្យាបាលរាងកាយ ចិត្តគំនិត និង ដួងព្រលឹងរបស់យើង តែនាងក៏បានសង្កត់បញ្ជាក់បន្ថែមដែរថា សេវាកម្មរបស់នាងមិនមានពាក់ព័ន្ធនឹងសកម្មភាពផ្លូវភេទនោះឡើយ។
តាមការបញ្ជាក់ពីនាង Aleksandra Kasperek អតិថិជនច្រើនបំផុតរបស់នាងគឺជាមនុស្សវ័យចន្លោះ ៤០-៦០ ឆ្នាំ។ អតិថិជនជាប្រចាំគឺតែងតែទៅរកសេវាកម្មរបស់នាងរៀងរាល់អាទិត្យដោយទទួលការឱបរយៈពេល ១ ម៉ោង ដើម្បីព្យាបាលភាពឯកា រួមទាំងបញ្ហាផ្សេងៗទៀត។
សេវាកម្មឱបរបស់នាងរួមមានចាប់ផ្ដើមដំបូងដោយការចាប់ដៃស្វាគមន៍គ្នា ណែនាំខ្លួនគ្នា និង ចុងបញ្ចប់គឺការឱបនេះឯង។ នាង Aleksandra នឹងសួរទៅអតិថិជននាងថាមកទីនេះក្នុងគោលបំណងអ្វី ដើម្បីនាងអាចងាយស្រួលផ្ដល់ការឱបមួយឱ្យត្រូវនឹងតម្រូវការភ្ញៀវ។
ដូចដែលបានរៀបរាប់ខាងលើ ច្បាប់នៃសេវាកម្មមួយនេះគឺផ្ដល់តែការឱប និង ជជែកព្យាបាលផ្លូវអារម្មណ៍ប៉ុណ្ណោះ ប្រសិនបើភ្ញៀវមានសកម្មភាពអ្វីពាក់ព័ន្ធនឹងផ្លូវភេទ នាងនឹងបញ្ចប់សេវាកម្មនោះភ្លាមៗតែម្ដង៕
ប្រភព៖ VN Express
