អ្នកលក់នំម្នាក់សង្ហាពេក ធ្វើឱ្យអ្នកលក់ក្បែរនាំគ្នាប្ដឹងដេញទៅលក់កន្លែងផ្សេង ក្រោយឃើញមនុស្សសម្រុកទិញច្រើន

បុរសជាអ្នកលក់នំ bungeoppang (នំ pancake រូបត្រី) ម្នាក់នៅក្រុងសេអ៊ូល ប្រទេសកូរ៉េខាងត្បូង បានក្លាយជាតារាល្បីម្នាក់តាមបណ្ដាញសង្គម ដោយសារតែរូបរាង មុខមាត់របស់លោកស្រស់សង្ហាខ្លាំង ជាពិសេសនោះមហាជនថាលោកដូចខ្លាំងទៅនឹងតារាសម្ដែងប្រុសដ៏ល្បីឈ្មោះ Jung Hae In។

លោក Kim Jong Oh ដែលមហាជនដាក់ងារហៅថា Bung Hae In ត្រូវបានឱ្យដឹងថាជាតារាម៉ូដែល freelance ម្នាក់ និង ក្រៅពីអាជីពនេះ លោកក៏ជាអ្នកលក់នំតាមផ្លូវម្នាក់ផងដែរ។

ចាប់តាំងពីផ្ទុះប្រជាប្រិយភាពកាលពីខែមុនមក មនុស្សក្នុងតំបន់ ក៏ដូចជាអ្នកទេសចរជាច្រើនបាននាំគ្នាសម្រុកទៅកន្លែងលក់នំរបស់លោកដែលមានទីតាំងនៅស្ថានីយ Sillim ដើម្បីបានឃើញសម្រស់ដ៏មានមន្តស្នេហ៍ ក៏ដូចជាទិញនំ bungeoppang របស់លោកផង។ ក្រៅពីជោគជ័យលើមុខជំនួញហើយនោះ លោក Jong Oh ក៏ផ្ទុះមានអ្នកតាមដានជាច្រើនលើ Instagram ហើយអាជីពជាម៉ូដែលរបស់លោកក៏ត្រូវបានក្រុមហ៊ុនប៊្រេនហ្វេសសិនជាច្រើនចាប់អារម្មណ៍ថែមទៀត។

យ៉ាងណាមិញ ដោយសារតែប្រជាប្រិយភាពរបស់លោកផ្ទុះខ្លាំងក្លាពេក បានធ្វើឱ្យមានការប៉ះពាល់ដល់មុខរបររបស់លោក ដោយលោក Jong Oh បានទម្លាយថា លោកលែងបានអនុញ្ញាតឱ្យលក់នៅទីតាំងដើមទៀតហើយ ព្រោះតែមានការប្ដឹងជាច្រើនពីអ្នកលក់ក្បែរខាង។

ថ្លឺងប្រកាសលើបណ្ដាញសង្គម លោក Jong Oh បានរៀបរាប់ថា៖ «ប្រសិនបើម្ចាស់ហាងណានៅក្បែរ Sillim-dong ព្រមសហការគ្នា ខ្ញុំស្ម័គ្របង់ថ្លៃជួល និង បន្តមុខជំនួញនេះតទៅទៀត។ ប្រសិនបើនរណាម្នាក់ស្គាល់កន្លែងសមល្អមួយ សូមធ្វើការទាក់ទងមកខ្ញុំផង»៕

ប្រភព៖ 8days