ហេតុតែស្រឡាញ់! ខំខ្ចីលុយគេសង់ផ្ទះឱ្យដូចផ្ទះ ឈីងចាំង ហើយចង់បង្កើតក្រុងដូចក្នុងរឿង ឈីងចាំង ទៀត

បុរសជនជាតិចិនអាយុ ២១ ឆ្នាំម្នាក់ ឈ្មោះ Jiang កំពុងតែធ្វើឱ្យក្ដីស្រមៃរបស់ខ្លួនក្លាយជាការពិត ដោយសាងសង់ផ្ទះឱ្យដូចទៅនឹងផ្ទះរបស់តុក្កតាជាទីស្រឡាញ់របស់ខ្លួន។

តាមសារព័ត៌មានចិនបានឱ្យដឹងថា លោក Jiang គឺស្រឡាញ់ចូលចិត្តរឿង «ឈីងចាំង» ជាខ្លាំង រហូតដល់ថ្នាក់រូបលោកចង់ធ្វើយ៉ាងណាឱ្យទិដ្ឋភាពក្នុងរឿងទាំងប៉ុន្មានអាចក្លាយជារូបភាពក្នុងជីវិតពិតជាក់ស្ដែង។

លោក Jiang បាននិយាយថា ក្នុងការធ្វើឱ្យក្ដីស្រមៃមួយនេះក្លាយជាការពិតគឺលោកជួបប្រទះបញ្ហាច្រើនមែនទែន ប៉ុន្តែលោកនៅតែអាចជម្នះបានដោយសារមានការជួយជ្រោមជ្រែងខ្លាំងក្លាបំផុតពីម្ដាយ។ ម្ដាយរបស់លោកបានឱ្យលុយលោកមួយចំនួនក្នុងការដំណើរការគម្រោងមួយនេះ។

យ៉ាងណាមិញ ដោយសារមហិច្ឆតារបស់លោកមិនមែនបញ្ចប់ត្រឹមសាងសង់ផ្ទះប៉ុណ្ណឹង លោក Jiang បានខ្ចីលុយគេថែមរហូតដល់ ៣ លានយ័ន (ប្រមាណជាង ៤០ ម៉ឺនដុល្លារ) ដើម្បីច្នៃប្រឌិតបន្ថែមឱ្យកើតជាក្រុងដូចតុក្កតា «ឈីងចាំង» រស់នៅ ក្នុងក្ដីសង្ឃឹមថានឹងទទួលបានចំណូលពីអ្នកទេសចរមកទស្សនាផ្ទះ និង ភូមិដែលលោកគ្រោងនឹងសាងសង់ឡើងនេះ។

គួរឱ្យដឹងថា លោក Jiang បានក្ដីស្រមៃចង់បង្កើតក្រុង Kasukabe ទាំងមូលដែលជាក្រុងដែលឈីងចាំងរស់នៅ រួមមានទាំងផ្ទះឈីងចាំង សាលាមតេយ្យ Futaba និង អ្វីៗផ្សេងទៀតរួមទាំងឡានក្នុងរឿងតុក្កតានោះផងដែរ៕

ប្រភព៖ 8days