ជាដំណឹងដ៏ភ្ញាក់ផ្អើល និង តក់ស្លុតមួយសម្រាប់អ្នកស្នេហាវិស័យបវរកញ្ញាប្រចាំប្រទេសអេក្វាឌ័រ ដោយនាង María Lorena Argüello ជាបេក្ខភាពមួយរូបនៅក្នុងកម្មវិធីប្រកួត Miss Universe Ecuador 2024 បានទទួលមរណភាពកាលពីថ្ងៃទី ០១ ខែមិថុនា ឆ្នាំ ២០២៥ កន្លងទៅ។
ដំណឹងដ៏តក់ស្លុតនេះត្រូវបានប្រកាសដោយគណៈកម្មាធិការជាតិរៀបចំការប្រកួត ប៉ុន្តែមិនមានបញ្ជាក់ពីមូលហេតុនៃការស្លាប់ភ្លាមៗរបស់បេក្ខភាពបវរកញ្ញារូបនេះឡើយ។ តាមការប្រកាសពីខាងស្ថាប័នលើបណ្ដាញសង្គមបានរៀបរាប់ថា៖ «ពួកយើងសម្ដែងការគោរព និង រួបរួមជាមួយក្រុមគ្រួសាររបស់នាង និង មនុស្សជាទីស្រឡាញ់របស់នាងក្នុងពេលវេលាដ៏សោកសៅមួយនេះ។ ការចងចាំរបស់នាងទាំងប៉ុន្មាននឹងនៅតែឋិតនៅជាមួយពួកយើងជានិច្ច»។
គួររំឭកថា នាង María Lorena Argüello អាយុ ២៨ ឆ្នាំ ជាបេក្ខភាពបវរកញ្ញាមួយរូបក្នុងការប្រកួតកម្មវិធី Miss Universe Ecuador ប្រចាំឆ្នាំ ២០២៤ ដោយនាងជាបេក្ខភាពតំណាងក្រុង Quito។ បើទោះជានាងមិនបានឈ្នះមកុដក្នុងការប្រកួតកាលពីឆ្នាំ ២០២៤ ក្ដី ប៉ុន្តែនាងបានតស៊ូរហូតជាប់ក្នុង top 13 ចុងក្រោយផងដែរ៕
ប្រភព៖ La Prensa
