កាលពីវេលាម៉ោងប្រមាណជា ៣ និង ១៥ នាទីរសៀលថ្ងៃទី ១០ ខែមេសា ឆ្នាំ ២០២៥ (ពេលវេលាក្នុងតំបន់) មានហេតុការណ៍ធ្លាក់ឧទ្ធម្ភាគចក្រដ៏រន្ធត់មួយបានកើតឡើងដោយបានឆក់យកអាយុជីវិតមនុស្សទាំង ៦ នាក់លើនោះ។ តាមព័ត៌មានបានឱ្យដឹថា ឧទ្ធម្ភាគចក្រមួយគ្រឿងនោះបានដឹងក្រុមគ្រួសារមួយមកពីអេស្ប៉ាញ (មនុស្សធំ ២ នាក់ និង ក្មេងៗ ៣ នាក់) រួមជាមួយអ្នកបើកបរម្នាក់ទៀត បានជួបគ្រោះថ្នាក់ធ្លាក់ចូលក្នុងទន្លេ Hudson ជិតតំបន់ Lower Mantattan ក្រុងញ៉ូយ៉ក សហរដ្ឋអាមេរិក។
មិនទាន់មានព័ត៌មានច្បាស់ការណាមួយបញ្ជាក់ថា ឧទ្ធម្ភាគចក្រមួយនោះជាឧទ្ធម្ភាគចក្រជួលលក្ខណៈទេសចរណ៍ ឬជាឧទ្ធម្ភាគចក្រផ្ទាល់ខ្លួននោះឡើយ ដោយមូលហេតុបណ្ដាលឱ្យធ្លាក់ខាងអាជ្ញាធរកំពុងដាក់ការស៊ើបអង្កេតនៅឡើយ។
«ពួកយើងសុំធ្វើការរំលែកទុក្ខដល់ក្រុមគ្រួសារនៃជនរងគ្រោះផង។ ជនរងគ្រោះទាំង ៦ នាក់ត្រូវបានទាញចេញពីក្នុងទឹក ប៉ុន្តែជាអកុសលមិនមាននរណាម្នាក់នៅរស់រានមានជីវិតនោះឡើយ» នេះបើតាមការលើកឡើងពីលោកអភិបាលក្រុងញ៉ូយ៉ក៕
