ថ្មីៗនេះ តារាសម្ដែងប្រុសដ៏ល្បីប្រចាំទូរទស្សន៍ TVB លោក Bosco Wong បានធ្វើឱ្យមហាជនក៏ដូចជាអ្នកគាំទ្រជាច្រើនភ្ញាក់ផ្អើលខ្លាំង នៅពេលដែលលោកចេញមកទម្លាយមូលហេតុដែលមិនព្រមរៀបការសាងគ្រួសារ ទោះបីឥលូវអាយុ ៤៤ ឆ្នាំហើយក៏ដោយ។
ក្នុងកិច្ចសម្ភាសមួយ តារាប្រុស Bosco Wong បាននិយាយថា លោកសម្រេចចិត្តមិនរៀបចំព្រោះតែចង់សងសឹកម្ដាយរបស់លោក។ Bosco Wong បាននិយាយថា៖ «ម្ដាយខ្ញុំចូលចិត្តដេញមិត្តស្រីខ្ញុំចេញ។ អ៊ឹចឹងល្អហើយ ខ្ញុំមិនរៀបការទៀតទេ ធ្វើឱ្យគាត់ខឹងម្ដងមើល»។
តាមការរៀបរាប់របស់តារាប្រុសមុខស្រស់ Bosco Wong បានទម្លាយថា ម្ដាយរបស់លោកធ្លាប់ធ្វើរឿងមិនល្អខ្លាំងដាក់ស្នេហាដំបូងរបស់លោក ហើយវានៅតែលងបន្លាចលោករហូតដល់សព្វថ្ងៃ។ Bosco ជាមនុស្សឆាប់ធ្លាក់ក្នុងអន្លង់ស្នេហ៍គេណាស់ ដោយមានស្នេហាដំបូងតាំងពីពេលលោករៀនថ្នាក់ទី ៦។
នៅពេលនោះ លោកសប្បាយចិត្តបាននាំមិត្តស្រីដំបូងខ្លួនទៅណែនាំឱ្យក្រុមគ្រួសារស្គាល់នៅផ្ទះដោយសង្ឃឹមថាបានការសាទរពីពួកគេ។ យ៉ាងណាមិញ អ្វីៗមិនដូចការរំពឹងទុក ម្ដាយរបស់លោកមិនពេញចិត្ត ផ្ទុះកំហឹងរហូតយកទឹកត្រជាក់ជះមកលើលោកទៀត។ លើសពីនេះ ម្ដាយរបស់លោកថែមទាំងមើលងាយមិត្តស្រីលោក ប្រើពាក្យសម្ដីធ្ងន់រហូតដេញនាងចេញពីជីវិតលោកទៀត។ ក្រោមពាក្យមើលងាយ និង សម្ពាធប្រឆាំងពីម្ដាយ Bosco ចំណងស្នេហ៍ដំបូងមួយនេះក៏ត្រូវបញ្ចប់។
ការបែកស្នេហាដំបូងនេះហើយបានបន្សល់ស្លាកស្នាមកដិតដាមក្នុងបេះដូង Bosco Wong រហូតដល់សព្វថ្ងៃ។ លោកគឺនៅតែមិនយល់ថាហេតុអ្វីបានជាម្ដាយលោកជ្រៀតជ្រែកក្នុងជីវិតស្នេហារបស់លោកខ្លាំងបែបនេះ ហើយប្រហែលជាបែបនេះហើយទើបលោកបានប្រើប្រាស់ពាក្យសម្ដីបែបនេះដើម្បីបញ្ឈឺទៅម្ដាយវិញ។
ការបើកកកាយលើកឡើងរបស់ Bosco Wong នេះដែរ បានបង្កឱ្យមានការផ្ទុះវែកញែកពាសពេញបណ្ដាញសង្គមក្នុងប្រទេសចិន ដោយមហាជនមួយចំនួនបង្ហាញការមិនពេញចិត្ត និង ខឹងចំពោះការលើកឡើងរបស់លោកចំពោះម្ដាយខ្លួនផងដែរ៕
ប្រភព៖ Kenh14
