ថ្មីៗនេះ តារាសម្ដែងប្រចាំទូរទស្សន៍ TVB ដ៏ល្បី លោក Benjamin Yuen បានធ្វើកិច្ចសម្ភាសមួយដោយក្នុងនោះមានសំនួរមួយសួរលោកថា ហេតុអ្វីបានជាមិនសូវឃើញលោកសម្ដែងច្រើនក្នុងរយៈពេលប៉ុន្មានឆ្នាំមកនេះ។ ពោលក្នុងឆ្នាំ ២០២៤ តារាប្រុស Benjamin ឃើញបង្ហាញខ្លួនសម្ដែងក្នុងរឿងភាគចំនួន ២ តែប៉ុណ្ណោះរួមមានរឿង «No Room For Crime» និង រឿង «Forensic Heroes 6»។
ជាការឆ្លើយតប Benjamin បានរៀបរាប់ថា៖ «វាជាការរៀបចំរបស់ក្រុមហ៊ុន អ៊ីចឹងខ្ញុំធ្វើអ្វីមិនបានទេ។ ជីវិតខ្ញុំតែបែបនេះឯង»។ តារាប្រុសវ័យ ៤៣ ឆ្នាំរូបនេះបានទម្លាយទៀតថា មានពេលមួយលោកទទួលបានការពេញចិត្តពីខាងក្រុមហ៊ុនហើយទទួលបានដំណែងច្រើន ប៉ុន្តែអ្វីៗត្រូវបានផ្លាស់ប្ដូរទាំងស្រុងក្រោយការគ្រប់គ្រងរបស់ក្រុមហ៊ុនត្រូវបានផ្លាស់ប្ដូរ។ លោកបានបន្តថា៖ « ក្រោយនាយកប្រតិបត្តិត្រូវបានផ្លាស់ប្ដូរ ប្រព័ន្ធការងារទាំងអស់ត្រូវបានផ្លាស់ប្ដូរ អ្នកដែលធ្លាប់ផ្ដល់ការងារឱ្យខ្ញុំគឺចាកចេញអស់ ដូច្នេះខ្ញុំត្រូវចាប់ផ្ដើមគ្រប់យ៉ាងសាជាថ្មីឡើងវិញ»។
គួរឱ្យដឹងថា ក្រុមហ៊ុន TVB មួយរយៈចុងក្រោយនេះបានផ្ដោតសំខាន់លើការសហការគ្នាជាមួយខាងចិដីគោក ដែលជាលទ្ធផលធ្វើឱ្យមានការធ្លាក់ចុះចំនួននៃការផលិតកម្មវិធីជារៀងរាល់ឆ្នាំ។ ហេតុដូច្នេះហើយបានជាតារាសម្ដែង Benjamin ទទួលបានដំណែងសម្ដែងតែមួយ ឬពិរក្នុងមួយឆ្នាំនោះ។ លោកក៏បានទម្លាយឱ្យដឹងទៀតថា មិនមែនលោកតែម្នាក់នោះទេដែលជួបបញ្ហាការងារនេះ តារាៗរួមអាជីពជាច្រើនរូបទៀតក៏ជួបប្រទះស្ថានការណ៍ដូចគ្នានេះដែរ។
ទោះជាយ៉ាងណា បើតាមរបាយការណ៍មួយបានអះអាងថា លោក Benjamin មិនទាន់មានគម្រោងថានឹងចាកចេញពី TVB នោះឡើយ ទោះជួបប្រទះបញ្ហាមួយចំនួនក៏ដោយ៕
ប្រភព៖ 8days
