នៅថៃប្រកាសបិទទ្វារសាលាបណ្ដោះអាសន្ន ក្រោយកូវីដផ្ទុះកាន់តែខ្លាំង ត្រឹម​ ១ សប្ដាហ៍រកឃើញអ្នកឆ្លងថ្មីជាង ៥ ម៉ឺននាក់

កាលពីថ្ងៃទី ២៦ ខែឧសភា ឆ្នាំ ២០២៥ សារព័ត៌មាន Bangkok Post បានចេញផ្សាយថា ស្ថានការណ៍កូវីដ-១៩ ក្នុងប្រទេសថៃ គឺនៅតែបង្កជាក្ដីបារម្ភនៅឡើយខណៈក្នុងពេលត្រឹមមួយសប្ដាហ៍ រកឃើញអ្នកឆ្លងកូវីដរហូតដល់ទៅជាង ៥៣ ០០០ នាក់ ដោយក្នុងនោះទីក្រុងបាងកកមានចំនួនឆ្លងច្រើនជាងគេបំផុត។

ជាក់ស្ដែង តាមរបាយការណ៍ពីនាយកដ្ឋានប្រយុទ្ធប្រឆាំងជំងឺឆ្លងប្រចាំប្រទេសថៃ (DDC) បានបញ្ជាក់ថា គិតចាប់ពីថ្ងៃទី ១៨ ដល់ថ្ងៃទី ២៤ ខែឧសភា ឆ្នាំ ២០២៥ ប្រទេសថៃ រកឃើញអ្នកកើតកូវីដ-១៩ សរុបចំនួន ៥៣ ៥៦៣ នាក់ និង ករណីស្លាប់ចំនួន ៥ នាក់បន្ថែម។ ក្នុងចំណោមអ្នកឆ្លងថ្មីនេះដែរ មាន ៥០ ៧៣៦ នាក់ ជាអ្នកជំងឺក្រៅមន្ទីរពេទ្យ ខណៈ ២ ៨២៧ នាក់ផ្សេងទៀត ជាអ្នកជំងឺព្យាបាលក្នុងមន្ទីរពេទ្យ។

ខេត្ត-ក្រុងចំនួន ៥ ដែលមានចំនួនអ្នកឆ្លងកូវីដខ្ពស់ជាងគេបំផុតកាលពីសប្ដាហ៍មុនរួមមាន ៖ ទីក្រុងបាងកក (៩ ៥៣៩ ករណី) ខេត្ត Chonburi (៣ ៣៧៩ ករណី) ខេត្ត Samut Prakan (២ ៤៩១ ករណី) ក្រុង Nonthaburi (២ ២៧៨ ករណី) និង ក្រុង Rayong (២ ២១០ ករណី)។

នៅខេត្ត Samut Prakan ការបន្តកើនឡើងចំនួនអ្នកឆ្លងកូវិដ-១៩ នេះបានបណ្ដាលឱ្យសាលារៀន Ratwinit Bangkaeo នៅសង្កាត់ Bang Phli ត្រូវបិទទ្វារបណ្ដោះអាសន្ន ដោយផ្លាស់ប្ដូរឱ្យសិស្សរៀនតាមអនឡាញវិញ។ គួររំឭកដែរថា ចាប់តាំងពីដើមឆ្នាំ ២០២៥ មក ចំនួនអ្នកកើតកូវីដ-១៩ សរុបក្នុងប្រទេសថៃ បានកើតដល់ ១៨៦ ៩៥៥ នាក់ និង អ្នកស្លាប់ចំនួន ៤៦ នាក់៕

ប្រភព៖ Bangkok Post