អតីតព្រះនាងប្រទេសជប៉ុន Mako ដែលជាព្រះរាជនត្តាព្រះចៅអធិរាជ Naruhito បានស្វាគមន៍ទាយាទដំបូងជាមួយស្វាមីជារាស្ត្រសាមញ្ញ Kei Komuro ហើយនៅឯសហរដ្ឋអាមេរិក។ នេះជាលើកដំបូងហើយដែលខាងក្រុមគ្រួសារសែរាជវង្សបានប្រកាសដំណឹងទាក់ទងនឹងអតីតព្រះនាង Mako។
តាមការបញ្ជាក់ពីទីភ្នាក់ងារគ្រួសារអធិរាជបានលើកឡើងថា ទាំងម្ដាយ និង កូនគឺមានសុខភាពល្អ ប៉ុន្តែមិនបានបញ្ជាក់ពីភេទ ឬពេលវេលាជាក់លាក់នៃការសម្រាលនោះឡើយ។ ខាងមន្ត្រីប្រចាំប្រទេសជប៉ុនបានឱ្យដឹងទៀតថា បើទោះជាដំណឹងល្អមួយនេះមិនពាក់ព័ន្ធនឹងគ្រួសាររាជវង្សទៀតក៏ពិតមែន ប៉ុន្តែពួកគេសម្រេចចិត្តប្រកាសក្រោយខាងសារព័ត៌មានបានចេញផ្សាយថា Mako បានផ្ដល់កំណើតឱ្យកូននៅដើមខែនេះ។
អតីតព្រះនាង Mako បច្ចុប្បន្នមានវ័យ ៣៣ ឆ្នាំ ជាកូនស្រីច្បងនៃព្រះរាជបុត្រ Akishino និង ព្រះមហាសី Kiko។ ព្រះនាងសម្រេចលះបង់ចោលឋានៈក្នុងសែរាជវង្សកាលពីឆ្នាំ ២០២១ កន្លងទៅ នៅពេលដែលព្រះនាងចាប់ដៃបុរសជាមិត្តរួមថ្នាក់ និង ជារាស្ត្រសាមញ្ញម្នាក់ឈ្មោះ Kei Komuro រៀបការ។ ក្រោយរៀបការជាប្ដីប្រពន្ធរួចមិនបានប៉ុន្មាន Mako និង ស្វាមីក៏បានផ្លាស់ទៅរស់នៅទីក្រុងញ៉ូយ៉ក សហរដ្ឋអាមេរិក៕
