កាលពីដើមខែមករា ឆ្នាំ ២០២៥ នេះ តុលាការប្រចាំសង្កាត់ Xiping ខេត្ត Henan ប្រទេសចិន បានជួបភាពស្មុគស្មាញក្នុងការដោះស្រាយករណីបែងចែកលុយអាំងប៉ាវកូនស្រីចំនួន ២ នាក់ទៅឱ្យឪពុកម្ដាយរបស់ពួកគេក្នុងករណីលែងលះគ្នា។
តាមការឱ្យដឹង ប្ដីប្រពន្ធខាងលើមានកូនស្រីចំនួន ២ នាក់ ហើយនៅថ្ងៃឈប់សម្រាក ជីដូនជីតា និង សាច់ញាតិរបស់ពួកគេតែងតែឱ្យអាំងប៉ាវជាលុយរាប់រយទៅរាប់ពាន់យ័នជានិច្ច ដោយលុយទាំងនោះគឺបានរក្សាទុកនៅម្ដាយរបស់ពួកគេ។ រហូតមកដល់ចុងឆ្នាំ ២០២៤ កន្លងទៅ ចំនួនលុយអាំងប៉ាវដែលទទួលបានពីសាច់ញាតិនោះគឺសរុបទៅបានរហូតដល់ជាង ៥ ម៉ឺនយ័ន (៦ ៨៨៤ ដុល្លារ) ឯណោះ។
យ៉ាងណាមិញ មកដល់ខែមករា ឆ្នាំ ២០២៥ ដោយសារតែភាពមិនចុះសម្រុងគ្នា ប្ដីប្រពន្ធខាងលើក៏បានដាក់ពាក្យលែងលះគ្នា ទាមទារសិទ្ធិចិញ្ចឹមកូន និង ពិសេសនោះទាមទារឱ្យមានការបែងចែកលុយអាំងប៉ាវរបស់កូនៗថែមទៀត។ នៅក្នុងតុលាការ ភាគីខាងប្ដីបានយល់ព្រមលែងលះក្នុងលក្ខខណ្ឌដែលលោកនឹងទទួលចិញ្ចឹមបីបាច់កូនស្រីទាំងពីរ តែក៏បានសង្កត់ធ្ងន់បន្ថែមថាលុយអាំងប៉ាវរបស់កូនៗគឺជាទ្រព្យដាច់ដោយឡែក មិនអាចចាត់ចូលជាទ្រព្យសម្បត្តិប្ដីប្រពន្ធដែលត្រូវបែងចែកគ្នាពេលលែងលះរួចហើយនោះទេ។
អំឡុងពេលកាត់ក្ដី ខាងតុលាការគឺបានរកឃើញថាចំណងអាពាហ៍ពិពាហ៍របស់ប្ដីប្រពន្ធមួយគូនោះគឺពិតជាមិនអាចស្រោចស្រង់បាននោះទេ ដូច្នេះតុលាការសម្រេចយល់ព្រមការស្នើលែងលះគ្នានេះ ប៉ុន្តែតុលាការគឺមិនទទួលឡើយនូវការស្នើសុំបែងចែកលុយអាំងប៉ាវរបស់កូនៗពួកគេនោះ។ ខាងតុលាការបានបកស្រាយថា លុយទាំងនោះគឺជាអំណោយដែលក្មេងៗក្នុងគ្រួសារទទួលបានពីសាច់ញាតិចាស់ៗរបស់ពួកគេ ហើយជាងនេះទៅទៀត លុយទាំងនោះគឺជារបស់ក្មេងៗទាំងពីរ និង មិនមែនជាទ្រព្យសម្បត្តិរួមរបស់ឪពុកម្ដាយពួកគេនោះឡើយ ពោលគឺឪពុកម្ដាយដែលជាអាណាព្យាបាលគឺមិនមានសិទ្ធិបំពានលើទ្រព្យសម្បត្តិរបស់កូនៗរបស់ខ្លួននោះឡើយ។
ជាលទ្ធផល តុលាការបានប្រកាសឱ្យប្ដីប្រពន្ធមួយគូនោះលែងលះគ្នាដោយស្របច្បាប់ ខណៈកូនស្រីទាំងពីរត្រូវបានខាងឪពុកជាអ្នកទទួលចិញ្ចឹមបីបាច់ថែរក្សា។ ចំណែកខាងម្ដាយនឹងនៅផ្ដល់ជំនួយថ្លៃចិញ្ចឹមបីបាច់កូន ហើយចំពោះលុយអាំងប៉ាវរបស់ក្មេងទាំងពីរត្រូវរក្សាទុកនៅឪពុកវិញ៕
ប្រភព៖ Kenh14
