ជាដំណឹងដ៏តក់ស្លុតមួយដោយតារាសម្ដែងស្រីអាមេរិក Michelle Trachtenberg បានទទួលមរណភាពទៅហើយក្នុងវ័យ ៣៩ ឆ្នាំ។ សាកសពរបស់នាងត្រូវបានម្ដាយប្រទះឃើញនៅម៉ោង ៨ ព្រឹកថ្ងៃទី ២៦ ខែកុម្ភៈ ឆ្នាំ ២០២៥ (ពេលវេលាក្នុងតំបន់) ក្នុងផ្ទះរបស់នាងនៅអគារអាផាតមិនដ៏ប្រណីតមួយនៅ Central Park South តំបន់ Manhattan សហរដ្ឋអាមេរិក នេះបើតាមការចេញផ្សាយពីសារព័ត៌មាន NY Post។
តាមការបញ្ជាក់ពីប៉ូលិសបានឱ្យដឹងថា តារាស្រី Michelle ត្រូវបានប្រទះឃើញសន្លប់ស្ដូកស្ដឹង ហើយពេលក្រុមគ្រូពេទ្យទៅដល់គឺនាងបានស្លាប់បាត់ទៅហើយ។ ជាមួយគ្នានោះដែរ បើតាមការទាក់ទងទៅលេខ ៩១១ គឺមានការរាយការណ៍ថាស្ត្រីម្នាក់មានបញ្ហាគាំងបេះដូង។ ប៉ូលិសបានឱ្យដឹងទៀតថា នៅទីតាំងកើតហេតុ គ្មានសញ្ញានៃបទឧក្រិដ្ឋអ្វីនោះឡើយ។
គួរឱ្យដឹងផងដែរថា កាលពីឆ្នាំទៅ Michelle បានធ្វើការវះកាត់ប្ដូរថ្លើមដោយពេលនោះនាងមានអាការថាសរីរាង្គនោះមិនទទួលយកនោះឡើយ។ នាងក៏បានធ្វើឱ្យអ្នកគាំទ្របារម្ភខ្លាំងផងដែរពេលបង្ហាញខ្លួនក្នុងសភាពខ្សោយ និង ស្លេកស្លាំង។ យ៉ាងណាមិញ បើតាមការសន្និដ្ឋានបឋម ប៉ូលិសសង្ស័យថា Michelle Trachtenberg បានស្លាប់ដោយធម្មជាតិ តែយ៉ាងណាខាងអាជ្ញាធរនៅបន្តរង់ចាំរបាយការណ៍ខាងកោសល្យវិច័យដើម្បីបញ្ជាក់ឱ្យច្បាស់ពីមូលហេតុដែលនាងស្លាប់ពិតប្រាកដ។
តារាសម្ដែងស្រី Michelle Trachtenberg ជាតារាសម្ដែងដ៏ល្បីមួយរូបនៅហូលីវូដ។ នាងចាប់ផ្ដើមអាជីពនេះលើកដំបូងក្នុងវ័យត្រឹម ១០ ឆ្នាំ ហើយរឿងដែលធ្វើឱ្យនាងផ្ទុះប្រជាប្រិយភាពខ្លាំងបំផុតនោះគឺរឿង «Gossip Girl»៕
