គ្រោះរញ្ជួយដីកម្រិត ៧.៤ រ៉ិចទ័រ បានវាយប្រហារលើប្រទេសអាហ្សង់ទីន បណ្ដាលឱ្យមានការប្រកាសអាសន្នពីរលកយក្សស៊ូណាមិនៅតាមឈូងសមុទ្រនៃប្រទេសឈីលី រួមទាំងការជម្លៀសពលរដ្ឋចេញពីផ្ទះទៅកាន់ទីទួលសុវត្ថិភាពផងដែរ។
បើតាមទីភ្នាក់ងារស្ទាបស្ទង់ភូមិសាស្ត្រអាមេរិក USGS បានកត់ត្រាគ្រោះរញ្ជួយដីកម្រិត ៧.៤ រ៉ិចទ័រ ក្នុងជម្រៅ ១០ គីឡូម៉ែត្រ នៅចម្ងាយប្រមាណ ២១៩ គីឡូម៉ែត្រពីក្រុង Ushuaia ប្រទេសអាហ្សង់ទីន។ គ្រោះរញ្ជួយដីនេះដែរ កើតមានឡើងនៅមុនម៉ោង ១ រសៀល ថ្ងៃទី ០២ ខែឧសភា ឆ្នាំ ២០២៥ (ពេលវេលាក្នុងតំបន់)។
មជ្ឈមណ្ឌលព្រមានពីរលកយក្សស៊ូណាមិនៅអាមេរិក បានចេញការព្រមានថា រលកយក្សអាចកើតមានក្នុងចន្លោះ ៣០០ គីឡូម៉ែត្រពីចំណុចកណ្ដាលនៃគ្រោះរញ្ជួយដី ហើយបើតាមការព្យាករណ៍ រលកស៊ូណាមិអាចកើតមាននៅក្រុង Puerto Williams ប្រទេសឈីលី នៅម៉ោង ៦ និង ៥៥ នាទីល្ងាច (ពេលវេលាក្នុងតំបន់)។
បច្ចុប្បន្ន មិនទាន់មានរបាយការណ៍ណាបញ្ជាក់ពីការខូចខាតនៅប្រទេសអាហ្សង់ទីន និង ឈីលី នៅឡើយទេ នេះបើតាមការចេញផ្សាយពីសារព័ត៌មាន The Mirror។
យ៉ាងណាមិញ ខាងរដ្ឋាភិបាលប្រទេសឈីលីបានចេញប្រកាសឱ្យមានការជម្លៀសពលរដ្ឋទៅកាន់កន្លែងសុវត្ថិភាពបន្ទាន់ ខណៈប្រទេសប្រឈមនឹងរលកយក្សស៊ូណាមិក្នុងកម្ពស់ដល់ ២.៧ ម៉ែត្រ ដោយរលកយក្សព្យាករណ៍ថាអាចវាយប្រហារនៅបណ្ដាក្រុងភាគខាងត្បូងប្រទេសនៅរយៈពេលប៉ុន្មានម៉ោងខាងមុខនេះ៕
ប្រភព៖ Kenh14
