យ៉ាងហោចណាស់មនុស្ស ៣០ នាក់បានស្លាប់ក្នុងហេតុការណ៍ប្រជ្រៀតជាន់គ្នាក្នុងពិធីបុណ្យសាសនា Maha Kumbh នៅក្រុង Prayagraj រដ្ឋ Uttar Pradesh ប្រទេសឥណ្ឌា ដែលជាពិធីបុណ្យសាសនាធំជាងគេបំផុតលើពិភពលោកមានមនុស្សចូលរួមរាប់លាននាក់ នេះបើតាមការបញ្ជាក់ពីខាងអាជ្ញាធរកាលពីថ្ងៃទី ២៩ ខែមករា ឆ្នាំ ២០២៥ កន្លងទៅ។
បន្ថែមពីនេះ អ្នកចូលរួមប្រមាណជា ៦០ នាក់ផ្សេងទៀតបានរងរបួសស្របពេលដែលអ្នកកាន់សាសនាបាននាំគ្នាសម្រុកចុះទន្លេដើម្បីធ្វើការងូតទឹកលាងបាប។ តាមការស្រង់សម្ដីរបស់កងកម្លាំងនៅទីតាំងផ្ទាល់ដោយសារព័ត៌មាន PTI បានឱ្យដឹងថា មនុស្សជាច្រើនបានរងរបួស និង ត្រូវបញ្ជូនទៅសង្គ្រោះភ្លាមៗជាបន្ទាន់ ក្រោយនាំគ្នាប្រជ្រៀតរហូតដាច់រណាំងការពារនៅ Sangam។
គួរបញ្ជាក់ផងដែរថា តាមរបាយការណ៍បញ្ជាក់ពីប៉ូលិសបានឱ្យដឹងថា មនុស្សចំនួន ៩០ នាក់ត្រូវបានបញ្ជូនទៅសង្គ្រោះនៅមន្ទីរពេទ្យ ដោយក្នុងនោះជនរងគ្រោះ ៣០ នាក់បានប្រកាសថាស្លាប់។ យ៉ាងណាមិញ បើតាមភ្បាក់ងារសារព័ត៌មាន AFP បានរាយការណ៍ថា មានមនុសយ៉ាងហោចណាស់ ១៥ នាក់បានស្លាប់ក្នុងហេតុការណ៍ជាន់គ្នាក្នុងពិធីបុណ្យសាសនាខាងលើនេះ។
ពិធីបុណ្យ Maha Kumbh Mela ឬ Great Pitcher Festival គឺប្រារព្ធធ្វើឡើងរាល់ ១២ ឆ្នាំម្ដង ហើយឆ្នាំនេះពិធីបុណ្យបានប្រារព្ធធ្វើឡើងនៅក្រុង Prayagraj នាភាគខាងជើងរដ្ឋ Uttar Pradesh បានទាក់ទាញអ្នកទេសចរទាំងឥណ្ឌា និង បរទេសរហូតដល់ជាង ៤០០ លាននាក់ឱ្យចូលរួមទស្សនា៕
