នៅថ្ងៃទី ១២ ខែធ្នូ ឆ្នាំ ២០២៤ នេះ តារាចម្រៀង Selena Gomez បានធ្វើឱ្យអ្នកគាំទ្រជាច្រើនមានការភ្ញាក់ផ្អើលជាខ្លាំងនៅពេលដែលរូបនាងបានប្រកាសថាបានភ្ជាប់ពាក្យជាមួយគូស្នេហ៍ Benny Blanco ហើយ ក្រោយមានទំនាក់ទំនងស្នេហាជាមួយគ្នាអស់រយៈពេល ១ ឆ្នាំមកនេះ។
Selena បានប្រកាសដំណឹងដ៏រីករាយនេះលើបណ្ដាញសង្គម Instagram របស់ខ្លួនជាមួយកម្រងរូបភាពមួយចំនួនរបស់នាង និង គូដណ្ដឹង ថែមជាមួយការបង្ហាញនូវចិញ្ចៀនពេជ្រភ្ជាប់ពាក្យយ៉ាងធំភ្លឺចែងចាំង។ ក្រោយការបង្ហោះមិនបានប៉ុន្មាន សង្កេតឃើញថា Selena ទទួលបានការចុច like និង ការបញ្ចេញមតិអបអរចំពោះពួកគេទាំងពីរជាច្រើន មិនថាតែមិត្តៗសិល្បកររួមអាជីព និង អ្នកគាំទ្របាននាំគ្នាចូលទៅបង្ហាញការរំភើប និង អបអរដល់គូស្នេហ៍តារាមួយគូនេះព្រោងព្រាត។
គួររំឭកថា តារាចម្រៀង Selena Gomez និង លោក Benny Blanco បានបង្ហាញចំណងស្នេហ៍ជាសាធារណៈកាលពីខែធ្នូ ឆ្នាំ ២០២៣ កន្លងទៅ ដោយទំនាក់ទំនងស្នេហារបស់អ្នកទាំងពីរនៅតែផ្អែមល្ហែមស្អិតល្មួតពីមួយថ្ងៃទៅមួយថ្ងៃ បើទោះជាពេលខ្លះពួកគេរងមតិរិះគន់មិនពេញចិត្តពីមហាជនមួយចំនួនក៏ដោយ៕
