ថ្ងៃនេះ ពលរដ្ឋរាប់រយលាននាក់នៅអាមេរិក នាំគ្នាទៅបោះឆ្នោតជ្រើសរើសប្រធានាធិបតីអាណត្តិថ្មីទី ៤៧ ហើយ

ថ្ងៃទី ០៥ ខែវិច្ឆិកា ឆ្នាំ ២០២៤ នេះ ជាថ្ងៃបោះឆ្នោតជ្រើសរើសប្រធានាធិបតីអាមេរិកថ្មីប្រចាំអាណត្តិទី ៤៧ ដោយមានពលរដ្ឋប្រមាណជា ១៧០ លាននាក់ចូលរួមបោះឆ្នោតជ្រើសរើសបេក្ខភាពដែលពួកគេគាំទ្ររវាងលោក Donald Trump និង លោកស្រី Kamala Harris។

ទីក្រុងចំនួន ៣ នៅរដ្ឋ New Hampshire រួមមានក្រុង Dixville Notch, Hart’s Location និង Millsfield គឺជាទីតាំងដំបូងគេដែលបើកឱ្យពលរដ្ឋទៅបោះឆ្នោតចាប់ពីម៉ោង ១២ អធ្រាត្ររំលងចូលថ្ងៃទី ០៥ ខែវិច្ឆិកា (ពេលវេលាក្នុងតំបន់)។ ដោយឡែកសម្រាប់ទីតាំងបោះឆ្នោតជាច្រើនផ្សេងទៀតនៅក្នុងសហរដ្ឋអាមេរិកទាំងមូលនឹងបើកឱ្យពលរដ្ឋបោះឆ្នោតចាប់ពីម៉ោង ៧ ព្រឹក ដល់ ៩ ព្រឹកនៅថ្ងៃទី ០៥ ខែវិច្ឆិកា ដោយពេលវេលាគិតទៅតាមរដ្ឋនីមួយៗក្នុងសហរដ្ឋអាមេរិក ហើយចាប់ពីម៉ោង ៦ ល្ងាចដល់ពាក់កណ្ដាលអធ្រាត្រ ការបោះឆ្នោតនឹងត្រូវបិទបញ្ចប់។ ចំពោះលទ្ធផលបោះឆ្នោតគឺរំពឹងថានឹងចាប់ផ្ដើមប្រកាសពេលដែលការបោះឆ្នោតបានបិទបញ្ចប់នៅវេលាម៉ោង ៦ ល្ងាច (ពេលវេលាទៅតាមទីតាំង)។

គួរបញ្ជាក់ថា ប្រពៃណីនៃការបោះឆ្នោតជ្រើសរើសប្រធានាធិបតីថ្មីរបស់អាមេរិកដែលតែងតែធ្វើឡើងនៅថ្ងៃអង្គារសប្ដាហ៍ដំបូងនៃខែវិច្ឆិកានេះ គឺប្រារព្ធធ្វើឡើងតាំងពីឆ្នាំ ១៨៤៥ មកម្ល៉េះ។ ការសម្រេចចិត្តជ្រើសរើសយកថ្ងៃនេះគឺធ្វើឡើងដោយសភានៅពេលដែលសហរដ្ឋអាមេរិកនៅជាប្រទេសពឹងផ្អែកលើកសិកម្មមួយភាគធំ។ ការកំណត់យកពេលវេលាបោះឆ្នោតនេះគឺក្រោយពេលកសិករប្រមូលផលដំណាំនារដូវស្លឹកឈើជ្រុះ ដែលផ្ដល់ភាពងាយស្រួលដល់ពួកគេក្នុងការធ្វើដំណើរទៅកន្លែងបោះឆ្នោតដែលជាទូទៅនៅឆ្ងាយពីផ្ទះរបស់ពួកគេ ហើយពេលវេលា និង ទំនៀមទម្លាប់នេះដែរក៏កំណត់យកអនុវត្តរហូតមកដល់បច្ចុប្បន្ន៕

ប្រភព៖ Kenh14