នៅព្រឹកព្រលឹមថ្ងៃទី 0១ ខែវិច្ឆិកា ឆ្នាំ ២០២៤ កន្លងទៅ (ពេលវេលាក្នុងតំបន់) មានហេតុការណ៍បាញ់ប្រហារមួយបានកើតមានឡើងនៅកណ្ដាលក្រុង Orlando រដ្ឋ Florida សហរដ្ឋអាមេរិក អំឡុងពេលមនុស្សម្នាជាច្រើនកំពុងប្រារព្ធធ្វើពិធីបុណ្យ Halloween បង្កជាការរត់គេចប្រសេចប្រសាចចលាចលពេញតំបន់។
ក្នុងហេតុការណ៍បាញ់ប្រហារនោះដែរ បណ្ដាលឱ្យមនុស្ស ២ នាក់បាត់បង់ជីវិត ខណៈ ៦ នាក់ផ្សេងទៀតរងរបួស និង ត្រូវបានបញ្ជូនទៅសង្គ្រោះនៅមន្ទីរពេទ្យ។ ចំណែកជនសង្ស័យវិញ ក៏ត្រូវបានប៉ូលិសចាប់ខ្លួនបាននៅនឹងកន្លែងផងដែរ។
ចំពោះគោលបំណងជនសង្ស័យលើការបាញ់ប្រហារនេះ ប៉ូលិសក្រុង Orlando មិនបានទម្លាយប្រាប់នោះឡើយ គ្រាន់តែដឹងថាខ្មាន់កាំភ្លើងមានការប្រុងប្រយ័ត្នខ្លួនណាស់។ រូបគេបានដើរកាត់ប៉ូលិសជាច្រើនទាំងដៃមានកាន់កាំភ្លើង មុននឹងចូលទៅក្នុងហ្វូងមនុស្សធ្វើការបាញ់រះតែម្ដង។
គួរឱ្យដឹងថា ជនសង្ស័យជាក្មេងប្រុសអាយុ ១៧ ឆ្នាំម្នាក់ ធ្លាប់មានបទឧក្រិដ្ឋម្ដងរួចមកហើយ ដោយត្រូវប៉ូលិសចាប់ខ្លួនកាលពីឆ្នាំ ២០២៣ ពីបទលួចទ្រព្យសម្បត្តិគេ៕
