នៅព្រឹកថ្ងៃទី ០១ ខែវិច្ឆិកា ឆ្នាំ ២០២៤ នេះ មេធំ Facebook លោក Mark Zuckerberg បានធ្វើឱ្យមហាជនអ្នកលេងបណ្ដាញសង្គមរបស់លោកភ្ញាក់ផ្អើលជាខ្លាំង ក្រោយលោកបង្ហោះរូបភាពប៉ុន្មានសន្លឹករបស់លោក និង ក្រុមគ្រួសារក្នុងឈុតតុបតែងខ្លួនជាតួអង្គនានាដើម្បីចូលរួមពិធីបុណ្យ Halloween។
អ្វីដែលមហាជនចាប់អារម្មណ៍បំផុតនោះគឺការតុបតែងខ្លួនរបស់លោកក្នុងឆ្នាំនេះគឺមានភាពទាក់ទាញប្លែកជាងរាល់ដង ដោយលើកនេះលោកពាក់សក់វែង ជាមួយឈុតអាវធំពណ៌ខ្មៅ ផាត់ស្នាមរបួសលើមុខបន្តិចបន្តួចឱ្យដូចជាតួអង្គក្នុងរឿង John Wick។ អមដោយការបង្ហោះ លោក Mark Zuckerberg បានសរសេរសាររៀបរាប់ថា៖ «នៅពេលគ្រួសារយើងមានសុទ្ធតែមនុស្សស្រីតែងជាអ្នករាំរបាំបាឡេ ដូច្នេះយើងក៏ក្លាយជា John Wick»។
ការបង្ហោះរបស់ម្ចាស់ Facebook នេះដែរ បានធ្វើឱ្យមហាជនជាច្រើនភ្ញាក់ផ្អើល និង ចាប់អារម្មណ៍ជាខ្លាំងរហូតត្រឹមរយៈពេលតែមួយម៉ោង ការបង្ហោះនោះទទួលបានអ្នកចុច like ជាង ១៣ ម៉ឺននាក់ និង ខមមិនជាង ១៣ ម៉ឺនខមមិន៕
