នៅថ្ងៃទី ២១ ខែមីនា ឆ្នាំ ២០២៥ នេះ មន្ត្រីព្រលានយន្តហោះនៅកោះបាលី ប្រទេសឥណ្ឌូនេស៊ីបានប្រកាសថា យ៉ាងហោចណាស់ជើងហោះហើរអន្តរជាតិចំនួន ៧ ដែលគ្រោងហោះចេញពីលើកោះត្រូវបានលុបចោលវិញ ក្រោយភ្នំភ្លើងមួយនៅភាគខាងកើតកោះបានផ្ទុះឡើង បាញ់ជះផេះខ្មៅស្លុប ៨ គីឡូម៉ែត្រទៅលើអាកាស។
ភ្នំ Lewotobi Laki-Laki ដែលជាភ្នំភ្លើងកំពូលភ្លោះកម្ពស់ ១៧០៣ ម៉ែត្រលើកោះបាលី បានផ្ទុះឡើងរយៈពេល ១១ នាទី និង ៩ វិនាទី កាលពីថ្ងៃទី ២០ ខែមីនា ឆ្នាំ ២០២៥ កន្លងទៅ បណ្ដាលឱ្យខាងអាជ្ញាធរចេញការប្រកាសអាសន្នដល់កម្រិតខ្ពស់បំផុត។ រហូតមកដល់ម៉ោង ៩ និង ៤៥ នាទីព្រឹកថ្ងៃទី ២១ ខែមីនា ឆ្នាំ ២០២៥ នេះ (ពេលវេលាក្នុងតំបន់) ខាងអ្នកតំណាងព្រលានយន្តហោះអន្តរជាតិ Ngurah Rai បានប្រកាសថា ជើងហោះហើរអន្តរជាតិចំនួន ៧ ត្រូវបានលុបចោល ដោយក្នុងនោះជើងហោះហើរចំនួន ៦ ជារបស់ក្រុមហ៊ុន Jetstar គ្រោងហោះចេញឆ្ពោះទៅប្រទេសអូស្ត្រាលី និង ជើងហោះហើរមួយទៀតជារបស់ Air Asia គ្រោងហោះទៅទីក្រុងកូឡាឡាំពួ ប្រទេសម៉ាឡេស៊ី។
ដោយឡែក ជើងហោះហើរមួយចំនួនផ្សេងទៀតមានទាំងក្នុងស្រុក និង ក្រៅស្រុករួមមានប្រទេសថៃ សិង្ហបុរី និង អូស្ត្រាលី ក៏ត្រូវបានពន្យារពេលហោះហើរដូចគ្នា៕
ប្រភព៖ CNA
