បុរសម្នាក់នៅរដ្ឋ Michigan សហរដ្ឋអាមេរិក ល្បីល្បាញពីទឹកចិត្តមហាសប្បុរស ថ្មីៗកន្លងទៅត្រូវបានក្រុមគ្រួសាររបស់លោកសម្រេចក្ដីបំណងចុងក្រោយពេលដែលលោកចាកចេញពីពិភពលោកនេះទៅ ធ្វើឱ្យពលរដ្ឋក្នុងសហគមន៍ដែលលោករស់នៅមានការរំជួលចិត្តជាខ្លាំង។
តាមការចេញផ្សាយពីសារព័ត៌មាន Daily Mail បុរសចិត្តល្អខាងលើមានឈ្មោះ Darrel ‘Plant’ Thomas ជាម្ចាស់កន្លែងលាងឡានមួយកន្លែងនៅក្រុង East Detroit ដោយរូបលោកបានទទួលមរណភាពដោយជំងឺភ្លេចភ្លាំង (Alzheimer) ក្នុងវ័យ ៥៨ ឆ្នាំ ហើយសពរបស់លោកត្រូវបានរៀបចំពិធីបញ្ចុះរួចរាល់កាលពីថ្ងៃទី ២៧ ខែមិថុនា ឆ្នាំ ២០២៥ កន្លងទៅ។
យ៉ាងណាមិញ ពិធីបុណ្យសពរបស់លោក Thomas នេះដែរ គឺបានទាក់ទាញចំណាប់អារម្មណ៍មហាជនជាច្រើន ខណៈពេលបានឃើញឧទ្ធម្ភាគចក្រមួយគ្រឿងហោះក្រវែលលើដងវិថី Gratiot និង Connor Street ដែលជាទីតាំងហាង Airport Express Lube & Service របស់លោក Thomas ផ្ទាល់ រួចក៏ចាប់ផ្ដើមបាចស្រទាប់ផ្កាកូលាបរួមនឹងលុយជាច្រើនទម្លាក់ចុះមកក្រោម។
ចរាចរណ៍នៅលើគន្លងផ្លូវទាំង ៦ នៃវិថី Gratiot បានឈប់ធ្មឹងភ្លាមៗខណៈអ្នកបើកបរទាំងអស់នាំគ្នាឈប់មើលទិដ្ឋភាពលុយធ្លាក់ចុះពីលើមេឃ។ ពួកគេនាំគ្នាចុះទៅរើសលុយទាំងនោះដែលជាកាដូចុងក្រោយបង្អស់របស់លោក Thomas ចែកជូនដល់ពួកគេ។ ទិដ្ឋភាពដែលមើលទៅប្រៀបដូចក្នុងកុននេះបានរៀបចំឡើងដោយកូនប្រុសរបស់លោក Thomas។ ពួកគេបាននិយាយថា បំណងប្រាថ្នាចុងក្រោយរបស់ឪពុកមុនបិទភ្នែកចាកចេញពីពិភពលោកនេះទៅ គឺគាត់ចង់តបស្នងក្ដីស្រឡាញ់ដែលគ្រប់គ្នាផ្ដល់ឱ្យគាត់ដោយការបរិច្ចាគលុយសន្សំរបស់គាត់។
បើតាមការបញ្ជាក់ពីចៅស្រីរបស់លោក Thomas ឈ្មោះ Crystal Perry នាងបានឱ្យដឹងថាចំនួនប្រាក់ដែលបាចចុះមកនោះសរុបទាំងអស់មានចំនួន ៥ ពាន់ដុល្លារ។ អ្វីដែលគួរឱ្យសរសើរនោះគឺថា ពលរដ្ឋនៅខាងក្រោម ពេលដែលលុយបាចចុះមក ពួកគេគឺរក្សាភាពស្ងៀមស្ងាត់ និង ផ្ដល់ការគោរពដល់សព ដោយការរើសលុយមិនមានការស្ទុះដណ្ដើមប្រវាយប្រតប់គ្នាអ្វីឡើយ៕
