នៅព្រឹកថ្ងៃទី ០៥ ខែមេសា ឆ្នាំ ២០២៥ (ពេលវេលាក្នុងតំបន់) ប្រទេស Papua New Guinea បានរងការវាយប្រហារដោយគ្រោះរញ្ជួយដីធ្ងន់ធ្ងរកម្រិត ៦.៩ រ៉ិចទ័រ រហូតមានចេញការព្រមានពីរលកយក្សស៊ូណាមិ។
តាមទិន្នន័យពីខាងភ្នាក់ងារស្ទាបស្ទង់ភូមិសាស្ត្រអាមេរិក (USGS) បានឱ្យដឹងថា គ្រោះរញ្ជួយដីបានវាយប្រហារប្រទេសខាងលើក្នុងជម្រៅជាង ៩ គីឡូម៉ែត្រ កាលពីវេលាម៉ោង ៦ និង ០៤ នាទីព្រឹក ដោយចំណុចកណ្ដាលស្ថិតនៅចម្ងាយប្រមាណជាង ១៩៣ គីឡូម៉ែត្រភាគខាងកើតក្រុង Kimbe នៃកោះ New Britain។
តាមភ្នាក់ងារ USGS បានបន្ថែមទៀតថា ការព្រមានពីរលកស៊ូណាមិគឺអាចកើតមានឡើងក្នុងកម្ពស់ពី ១ ទៅ ៣ ម៉ែត្រតាមផ្នែកមួយចំនួនក្នុងប្រទេស ហើយការប្រកាសឱ្យប្រុងប្រយ័ត្នពីរលកតូចៗកម្ពស់ ០.៣ ម៉ែត្រក៏ត្រូវបានដាក់ចេញលើកោះ Solomon ដែលនៅក្បែរខាងផងដែរ។
យ៉ាងណាមិញ ក្រោយមកការព្រមានពីរលកស៊ូណាមិនេះក៏ត្រូវបានលុបចោលវិញ ហើយចំពោះការប៉ះពាល់ខូចខាតដោយគ្រោះរញ្ជួយដីគឺមិនទាន់មានការរាយការណ៍បញ្ជាក់នោះឡើយ៕
ប្រភព៖ Dailymail
