នាវាមុជទឹកចុះមើលផ្កាថ្មមួយគ្រឿងដឹកភ្ញៀវ ៤៥ នាក់បានលិចចូលសមុទ្រក្រហម ស្លា./ ប់អស់មនុស្សជាច្រើន មានទាំងគ្រូពេទ្យ​ និង ក្មេង

កាលពីថ្ងៃទី ២៧ ខែមីនា ឆ្នាំ ២០២៥ កន្លងទៅ នាវាមុជទឹកទេសចរណ៍មួយគ្រឿងរបស់ក្រុមហ៊ុនអេហ្ស៊ីប Sindbad បានលិចចូលក្នុងសមុទ្រនាក្រុង Hurghada លើឈូងសមុទ្រក្រហម។ អ្នកទេសចរជាច្រើនមានវត្តមានក្នុងនាវាមុជទឹកមួយនោះ ខណៈពេលដែលលិចក្បែរផែ។

តាមអាជ្ញាធរក្នុងតំបន់បានឱ្យដឹងថា មនុស្សចំនួន ៦ នាក់បានស្លាប់ ស្របពេលខាងទូតក្រុងម៉ូស្គូនៅក្រុង Cairo ប្រទេសអេហ្ស៊ីបបានបញ្ជាក់ថា មានពលរដ្ឋរុស្ស៊ីចំនួន ៥ នាក់បានស្លាប់ក្នុងហេតុការណ៍នោះ ដោយមាន ២ នាក់ជាកូនក្មេង។ ជនរងគ្រោះដែលស្គាល់អត្តសញ្ញាណគឺលោក Ravil Valiullin អាយុ ៤០ ឆ្នាំ ជាអ្នកឯកទេសផ្នែកថ្នាំសន្លប់ និង ប្រពន្ធរបស់លោក Kristina អាយុ ៣៩ ឆ្នាំ ជាគ្រូពេទ្យផ្នែកកុមារ។ អ្នកទាំងពីរធ្វើការនៅមន្ទីរពេទ្យ Urussu Central Hospital នាសាធារណរដ្ឋ Tatarstan សហព័ន្ធរុស្ស៊ី។

គួរឱ្យដឹងថា នាវាមុជទឹក Sindbad ក្នុងថ្ងៃកើតហេតុបានដឹកអ្នកទេសចរសរុបចំនួន ៤៥ នាក់ ក្នុងដំណើរកម្សាន្តមុជចុះមើលផ្កាថ្មរយៈពេល ៤០ នាទី ហើយបើតាមវិបសាយរបស់ខាងក្រុមហ៊ុនបានបញ្ជាក់ដែរថា អ្នកបញ្ជានាវាមុជទឹកនេះគឺសុទ្ធតែជាក្រុមជំនាញដែលមានបទពិសោធយូរឆ្នាំ ហើយនាវាមុជទឹកខ្លួនឯងផ្ទាល់ក៏ផលិតនៅប្រទេសហ្វាំងឡង់ដែលអាចទ្រាំទ្រនឹងសម្ពាធក្រោមទឹករហូតដល់ ៧៥ ម៉ែត្រ ធានាបាននូវសុវត្ថិភាពរបស់អ្នកដំណើរ។

ក្នុងករណីជួបបញ្ហាអាសន្ន ខាងក្រុមហ៊ុនបានបន្ថែមឱ្យដឹងទៀតថា ម៉ាស់អុកស៊ីហ្សែនគឺមានបំពាក់នៅពីលើក្បាលកន្លែងអង្គុយរបស់អ្នកដំណើរ ហើយអាវពោងការពារអាយុជីវិតក៏មានបំពាក់នៅក្រោមកៅអីអង្គុយដូចគ្នា។ យ៉ាងណាមិញ ជុំវិញគ្រោះថ្នាក់លិចនាវាមុជទឹកនេះដែរខាងអាជ្ញាធរក៏កំពុងដុតដៃដុតជើងស្រាវជ្រាវស៊ើបរកមូលហេតុផងដែរ៕