កាលពីរសៀលថ្ងៃទី ២៣ ខែមេសា ឆ្នាំ ២០២៥ (ពេលវេលាក្នុងតំបន់) ប្រទេសតួកគីបានរងការវាយប្រហារដោយគ្រោះរញ្ជួយដីកម្រិត ៦.២ រ៉ិចទ័រ បង្កជាការរញ្ជួយខ្លាំងក្លាលើទីក្រុង Istanbul និង តំបន់ក្បែរខាងជាច្រើនទៀត។ បើតាមទីភ្នាក់ងារគ្រោះមហន្តរាយ AFAD ប្រចាំប្រទេសតួកគីបានឱ្យដឹងថា ចំណុចកណ្ដាលនៃគ្រោះរញ្ជួយដីនោះដែរស្ថិតនៅចម្ងាយជាង ៨០ គីឡូម៉ែត្រពីទីក្រុង Istanbul ក្នុ្ងងជម្រៅ ៦.៩២ គីឡូម៉ែត្រ។
ក្រោយគ្រោះរញ្ជួយដីខ្លាំងក្លានោះ ប្រទេសតួកគីក៏រងគ្រោះរញ្ជួយដីតាមក្រោយចំនួន ៣ ទៀតក្នុងកម្រិតចន្លោះពី ៤.៤ ទៅ ៥.៣ រ៉ិចទ័រ ប៉ុន្តែមិនទាន់របាយការណ៍ណាបញ្ជាក់ពីករណីស្លាប់ដោយគ្រោះមហន្តរាយនេះនៅឡើយទេ។ គួរឱ្យដឹងថា គ្រោះរញ្ជួយដីនេះដែរបានធ្វើឱ្យពលរដ្ឋជាច្រើនក្នុងប្រទេសតួកគីមានការភិតភ័យជាខ្លាំង។
ជាក់ស្ដែង ពិធីករទូរទស្សន៍ម្នាក់ឈ្មោះ Meltem Bozbeyoglu ខណៈកំពុងតែផ្សាយផ្ទាល់ក្នុងកញ្ចក់ទូរទស្សន៍ នាងស្រាប់តែភ័យរលីងរលោងទឹកភ្នែកពេលជួបគ្រោះរញ្ជួយដី ព្រោះតែភ័យបារម្ភចំពោះម្ដាយនៅផ្ទះ។ ក្រោយសម្រួលអារម្មណ៍បានខ្លះ Meltem ក៏បានងាកទៅសួរអ្នកនៅក្បែរនាងភ្លាមៗថា៖ «តើទាក់ទងទៅម្ដាយខ្ញុំបានទេ?»។ ជាមួយគ្នានោះដែរ វីដេអូស្ដែងៗមួយចំនួនទៀតក៏បានបង្ហាញឱ្យឃើញពលរដ្ឋជាច្រើនភ័យស្លន់នាំគ្នារត់ចេញពីផ្ទះចលាចលពេញផ្លូវគួរឱ្យរន្ធត់បំផុត។
គួររំឭកថា កាលពីខែកុម្ភៈ ឆ្នាំ ២០២៣ កន្លងទៅ ប្រទេសតួកគីបានរងគ្រោះរញ្ជួយដីកម្រិត ៧.៨ រ៉ិចទ័រដោយបានឆក់យកអាយុជីវិតមនុស្សដល់ទៅជាង ៥៣០០០ នាក់ និង មនុស្សរាប់រយពាន់នាក់ផ្សេងៗទៀតត្រូវបាត់បង់ផ្ទះគ្មានទីជ្រកអាស្រ័យ៕
