នៅថ្ងៃទី ០៣ ខែកក្កដា ឆ្នាំ ២០២៥ នេះ នាយកដ្ឋានផ្នែកសុខាភិបាលប្រចាំរដ្ឋ New South Wales ប្រទេសអូស្ត្រាលី បានចេញបញ្ជាក់ថា បុរសម្នាក់វ័យខ្ទង់ ៥០ ឆ្នាំ ត្រូវបានសត្វប្រចៀវខាំកាលពីប៉ុន្មានខែកន្លងទៅ រហូតឆ្លងវីរុសមួយហៅថា «Australian bat lyssavirus»។ ស្ថានភាពជំងឺរបស់លោកកាន់តែធ្ងន់ធ្ងរឡើងក្នុងសប្ដាហ៍នេះ ដោយជាអកុសល លោកក៏បានបាត់បង់ជីវិតនៅឯមន្ទីរពេទ្យ។
តាមនាយកដ្ឋានសុខាភិបាលបានលើកឡើងថា៖ «ការឆ្លងវីរុស Australian bat lyssavirus គឺកម្រណាស់ ហើយបច្ចុប្បន្នក៏មិនទាន់មានការព្យាបាលប្រកបដោយប្រសិទ្ធភាពនោះឡើយ»។ ជាមួយគ្នានោះដែរ ខាងអាជ្ញាធរក៏កំពុងពិនិត្យមើលផងដែរករណីមានកត្តាផ្សេងទៀតដែលពាក់ព័ន្ធនឹងស្ថានភាពជំងឺរបស់បុរសខាងលើ។
គួរបញ្ជាក់ថា វីរុស Australian bat lyssavirus ដែលជាវីរុសស្រដៀងនឹងវីរុសជំងឺឆ្កែឆ្កួត រកឃើញដំបូងក្នុងប្រទេសអូស្ត្រាលី ដោយវីរុសនេះចម្លងតាមទឹកមាត់សត្វប្រចៀវមកមនុស្សតាមរយៈការខាំ ឬខ្វាច។ អាការដំបូងនៃជំងឺនេះអាចចាយពេលច្រើនថ្ងៃ ឬរហូតដល់ឆ្នាំ ទម្រាំលេចចេញរោគសញ្ញា។ បើតាមអាជ្ញាធរសុខាភិបាល រោគសញ្ញាដំបូងនៃជំងឺនេះគឺស្រដៀងនឹងជំងឺផ្ដាសាយដែរ ដោយអ្នកជំងឺមានអាការឈឺក្បាល ក្ដៅខ្លួន និង អស់កម្លាំងល្ហិតល្ហៃ។ បន្ទាប់មក ស្ថានភាពអ្នកជំងឺនឹងប្រែជាធ្ងន់ធ្ងរបន្តិចម្ដងៗរហូតដល់ខ្វិនរាងកាយ ភ្លេចភ្លាំង ប្រកាច់ និង ឈានដល់ការស្លាប់។
មកទល់បច្ចុប្បន្ននេះ ករណីនៃជំងឺ Australian bat lyssavirus លើមនុស្សនេះ ទើបរកឃើញមាន ៣ ករណីប៉ុណ្ណោះ ចាប់តាំងពីរកឃើញករណីដំបូងក្នុងឆ្នាំ ១៩៩៦ មក ហើយទាំង ៣ ករណីសុទ្ធសឹងតែធ្ងន់ធ្ងរដល់ស្លាប់ទាំងអស់។ អាជ្ញាធររដ្ឋ New South Wales បានធ្វើការណែនាំដល់ពលរដ្ឋខ្លួនទាំងអស់ចៀសវាងការប៉ះពាល់សត្វប្រចៀវគ្រប់ប្រភេទទាំងអស់នៅអូស្ត្រាលី ដើម្បីការពារពីការឆ្លងវីរុស lyssavirus នេះ៕
