ជាការពិតណាស់ រឿងរ៉ាវប៉ះទង្គិចគ្នារវាងលោក Nawat និង បវរកញ្ញាឥណ្ឌា នាង Rachel Gupta នៅតែជាប្រធានបទក្ដៅគគុកនៅឡើយនៅតាមបណ្ដាញសង្គម។
បើទោះជាករណីមួយនេះនៅមិនទាន់ដោះស្រាយដោយសន្តិវិធីជាមួយគ្នាក៏ពិតមែន ប៉ុន្តែទាំងសងខាងគឺបានចេញមុខបកស្រាយ និង បង្ហាញភស្តុតាងរៀងៗខ្លួន។ ជាក់ស្ដែងខាងនាង Rachel បានចេញមុខធ្វើវីដេអូរយៈពេលជិត ១ ម៉ោង បកអាក្រាតខ្ទេចខ្ទីពីខាងស្ថាប័ន MGI ខណៈលោក Nawat បានចេញមកបង្ហោះភស្តុតាងលើ Story IG ពាក់ព័ន្ធនឹងការធ្វើខុសច្បាប់ក្រុមហ៊ុនពីសំណាក់នាង Rachel។
យ៉ាងណាមិញ ការចេញមកបកអាក្រាតនាង Rachel ពីសំណាក់លោក Nawat លើ IG គឺបានធ្វើឱ្យមហាជនអ្នកគាំទ្រវិស័យបវរកញ្ញាជាច្រើនផ្ទុះការមិនពេញចិត្តជាខ្លាំង ដោយមនុស្សជាច្រើនលើកឡើងថាទង្វើរបស់លោក Nawat គឺមិនសមជាប្រធាននៃកម្មវិធីបវរកញ្ញាទាល់តែសោះ។
កាលពីថ្មីៗកន្លងទៅ លោក Nawat បានធ្វើការចោទនាង Rachel ថាមិនគោរពតាមច្បាប់របស់ស្ថាប័ន MGI ដោយលួចទៅវះកាត់កែកុនដើមទ្រូង និង ទទួលកុងត្រាការងារដោយគ្មានការយល់ព្រមពីលោក។
ដើម្បីបញ្ជាក់ការលើកឡើងរបស់ខ្លួនឯងឱ្យកាន់តែច្បាស់ លោក Nawat បានធ្វើកាបង្ហោះរូបរបស់នាង Rachel អំឡុងពេលប្រកួតកម្មវិធី MGI 2024 មកធៀបនឹងរូបនាងបច្ចុប្បន្ននេះ ដើម្បីបញ្ជាក់ថា នាងពិតជាបានកែកុនដើមទ្រូងមែន។
តាមការសរសេររៀបរាប់លើរូប លោក Nawat បានបញ្ជាក់ថា ៖ «នាងបានទៅវះកាត់កែកុនដើមទ្រូងដោយខ្លួនឯង តែពេលខាងស្ថាប័នសួរទៅ នាងនិយាយថា វាប្រែប្រួលដោយសារនាងញ៉ាំប្រូតេអ៊ីនច្រើនពេក»។
ការចោទប្រកាន់មួយទៀត លោក Nawat ថានាង Rachel បានទាក់ទងខាងពេទ្យកែសម្ផស្សរបស់កូរ៉េ (ពេទ្យ sponsored ឱ្យ MGI top 10) ដោយខ្លួនឯង ដោយនិយាយថាចង់នាំម្ដាយទៅកែច្រមុះ និង ចង់ធ្វើដោយ free free។ លោក Nawat ក៏បានបង្ហោះរូបនាង Rachel និង ម្ដាយ ទាំងមុខបិទបង់ក្រោយវះកាត់រួចនៅកូរ៉េ យកមកធ្វើជាភស្តុតាងទៀត។
ទង្វើរបស់លោក Nawat ទាំងនេះហើយ បានធ្វើឱ្យអ្នកស្នេហាវិស័យបវរកញ្ញាជាច្រើននាំគ្នាមិនពេញចិត្ត និង រិះគន់យ៉ាងចាស់ដៃ ដោយពួកគេលើកឡើងថា លោក Nawat បានព្យាយាមមាក់ងាយរូបរាងកាយរបស់នាង Rachel ដើម្បីធ្វើឱ្យនាងខូចឈ្មោះ ក្រោយប្រកាសដកមកុដចេញពីនាងរួចមក៕
ប្រភព៖ Kenh14
