ធ្លាប់តែហៅ «មីង» ឥលូវដូរមកហៅ «អូន»! បុរសវ័យ ៤៧ ឆ្នាំ លង់ស្នេហ៍អ្នកជិតខាងអាយុ ៧០ ឆ្នាំ រៀបចំមង្គលការទ្រង់ទ្រាយធំមិនឱ្យចាញ់ក្មេងៗ

ថ្មីៗកន្លងទៅនេះ នៅប្រទេសម៉ាឡេស៊ីមានការរៀបចំធ្វើពិធីមង្គលការទ្រង់ទ្រាយធំមួយនៅក្រុង Lenggong រដ្ឋ Perak ដោយមានគូស្នេហ៍ចំនួន ២៥ គូបានចូលរួម។ យ៉ាងណាមិញ មានគូស្នេហ៍មួយគូដែលលេចធ្លោ និង ទទួលបានការចាប់អារម្មណ៍ខ្លាំងជាងគេបំផុត នោះគឺគូស្នេហ៍លោក Mohd Shaiful Nizam Yeop Mat Isa អាយុ ៤៧ ឆ្នាំ និង អនាគតភរិយា Repeah Sani អាយុ ៧០ ឆ្នាំ។

តាមការរៀបរាប់ពីសំណាក់កូនក្រមុំអាយុ ៧០ ឆ្នាំ Rapeah ដែលធ្លាប់បានរៀបការចំនួន ២ លើកហើយនោះបានឱ្យដឹងថា រូបគាត់មិនដែលធ្លាប់គិតថា គាត់នឹងស្លៀកឈុតរៀបការម្ដងទៀតនោះទេ ហើយក៏មិនធ្លាប់ដែលរំពឹងថា Nizam កើតមានអារម្មណ៍ស្រឡាញ់លើគាត់ដែរ ប៉ុន្តែយ៉ាងណាគាត់គឺរីករាយពេញចិត្តទទួលនិស្ស័យដែលបណ្ដាលឱ្យជួបជាមួយ Nizam បែបនេះ។

ងាកមកខាងកូនកំលោះវិញ គឺក៏មានក្ដីរំភើបក្នុងថ្ងៃអាពាហ៍ពិពាហ៍របស់ខ្លួនជាលើកដំបូងនេះផងដែរ។ លោកបានរៀបរាប់ថា លោកពិតជាអរគុណចំពោះនិស្ស័យដែលចារមកសម្រាប់លោកនេះណាស់។ លោកបានជួបគ្នាជាមួយ Rapeah ក្រោយវិលត្រឡប់ទៅក្រុង Lenggong វិញ ហើយទំនាក់ទំនងរបស់ពួកគេក៏បានរីកស្រស់ដូចផ្កាពេលដែលកាន់តែស្និទ្ធស្នាលគ្នាទៅ។

លោក Nizam បាននិយាយថា៖ «គាត់ជាអ្នកជិតខាងខ្ញុំ ហើយគាត់តែងតែចម្អិនម្ហូបឱ្យខ្ញុំជានិច្ច។ ខ្ញុំធ្លាប់ហៅគាត់ថា មីង តែឥលូវខ្ញុំហៅគាត់ថា អូនសំឡាញ់»៕

ប្រភព៖ World Of Buzz