នៅដើមឆ្នាំ ២០២៥ នេះ មហាជនជាច្រើននៅក្នុងប្រទេសចិនកំពុងផ្ទុះការភ្ញាក់ផ្អើលជាខ្លាំង ដោយតារាសម្ដែងប្រុស Lee Wei ដែលប្រិយមិត្តកម្ពុជាមួយចំនួនស្គាល់ច្បាស់ជាតួអង្គប្រុសម្នាក់ប្រចាំរឿង «ខ្នោះដៃចំណងស្នេហ៍» ត្រូវបានជាប់ពាក់ព័ន្ធជាជនសង្ស័យក្នុងករណីឃាតកម្មលើស្ត្រីម្នាក់នៅព្រះវិហារមួយកន្លែងក្នុងសង្កាត់ Dai An ក្រុងតៃប៉ិ ប្រទេសចិន។ ជនរងគ្រោះត្រូវបានស្គាល់ថាត្រកូល Cai ដែលត្រូវបានគេវាយដំរាងកាយរហូតស្លាប់។
តាមការប្រកាសពីខាងអាជ្ញាធរបានឱ្យដឹងថា លោក Lee Wei និង ភរិយារបស់លោកត្រូវបានអាជ្ញាធរកោះហៅមកសួរចម្លើយជាលើកទី ៤ ហើយនៅថ្ងៃទី ២៤ ខែកុម្ភៈ ឆ្នាំ ២០២៥ ហើយក្រោយការសាកសួររួចរាល់ ប៉ូលិសបានតឹកតាងគ្រប់គ្រាន់ក្នុងការផ្លាស់ឈ្មោះតារាសម្ដែងប្រុសរូបនេះពីសាក្សីទៅជាជនជាប់ចោទលើករណីឃាតកម្មខាងលើ។ ភ្លាមៗ អាជ្ញាធរបានដាក់ស្នើសុំដីកាចាប់ខ្លួន និង ឆែកឆេរផ្ទះរបស់ Lee Wei ដើម្បីស្វែងរកភស្តុតាងពាក់ព័ន្ធនឹងឃាតកម្មបន្ថែម។
គួរឱ្យដឹងផងដែរថា ក្រោយការចាប់ខ្លួនខាងភាគីរបស់លោក Lee Wei បានបង់ថ្លៃនៅក្រៅឃុំចំនួន ៣០ ម៉ឺនដុល្លារតៃវ៉ាន់ (ប្រមាណ ១ ម៉ឺនដុល្លារ) និង ១៥ ម៉ឺនដុល្លារតៃវ៉ាន់ (ប្រមាណ ៥ ពាន់ដុល្លារ) សម្រាប់ប្រពន្ធលោកឱ្យនៅក្រៅឃុំបណ្ដោះអាសន្នមុនថ្ងៃឡើងតុលាការ។
តាមការបញ្ជាក់ពីខាងប៉ូលិស ពួកគេបានរកឃើញសារសំឡេងសម្ងាត់លើទូរស័ព្ទជនម្នាក់ដែលពាក់ព័ន្ធករណីឃាតកម្មលើស្ត្រីខាងលើ ដោយសំឡេងនោះបានបង្ហាញថា លោក Lee Wei មិនត្រឹមតែធ្វើការបោកបញ្ឆោតខាងភ្នាក់ងារស៊ើបអង្កេតប៉ុណ្ណោះទេ ប៉ុន្តែថែមទាំងបានញុះញង់ឱ្យបក្ខពួកខ្លួនធ្វើទារុណកម្មលើជនរងគ្រោះរហូតដល់ស្លាប់ទៀតផង។ ជាងនេះទៅទៀត Lee Wei ក៏ជាប់សង្ស័យថាបានចួលរួមធ្វើទារុណកម្មលើជនរងគ្រោះដល់ស្លាប់ផងដែរ។ ប៉ូលិសបានបញ្ជាក់ទៀតថា ហាងតែរបស់ Lee Wei គឺអាចមិនមែនជាទីតាំងឃាតកម្មដំបូងឡើយ ព្រោះអាជ្ញាធររកឃើញរូបភាពពីកាមេរ៉ាសុវត្ថិភាពបង្ហាញថា Lee Wei បានជួបជនរងគ្រោះក្នុងថ្ងៃឃាតកម្មនោះ ហើយការណាត់ជួបគ្នានោះគឺនៅហាងតែរបស់ Lee Wei នេះឯង។
ឯកសារសំឡេងដែលប៉ូលិសរកបាន គឺជាភស្តុតាងដ៏សំខាន់បំផុតមួយក្នុងករណីនេះ ដោយវាអាចជួយប៉ូលិសក្នុងការស្វែងរកជនបង្ក។ អ្នកពាក់ព័ន្ធករណីឃាតកម្មនេះ បច្ចុប្បន្នប៉ូលិសរកឃើញចំនួន ១៣ នាក់ ដោយក្នុងនោះ ៧ នាក់ត្រូវបានចាប់ខ្លួន និង មិនអនុញ្ញាតឱ្យជួបជាមួយសាច់ញាតិ ឬ មិត្តភក្តិរបស់ពួកគេនោះឡើយ លើកលែងតែមេធាវីការពារក្ដីរបស់ខ្លួន។
គួរបញ្ជាក់ដែរថា ករណីឃាតកម្មលើស្ត្រីឈ្មោះ Cai បើតាមខាងអាជ្ញាធរនៅតៃវ៉ាន់បានឱ្យដឹងថា ស្ត្រីឈ្មោះ Cai បានទៅព្រះវិហារដើម្បីហ្វឹកហ្វឺន និង ធ្វើការជា accountant ក្នុងខែមេសា-ឧសភា ឆ្នាំ ២០២៤។ នៅទីនោះ នាង Cai និង អ្នកនិពន្ធល្បីម្នាក់ឈ្មោះ Wang Yun បានកើតមានជម្លោះជាមួយគ្នា ដោយហេតុផលអ្នកនិពន្ធរូបនោះមិនពេញចិត្តចំពោះការគណនាចំណូលក្នុងវិហារ និង ចំណាយលើសៀវភៅ។ មកដល់ខែកក្កដា ឆ្នាំ ២០២៤ ដោយមានគំនុំគុំកួនក្នុងចិត្ត បុរសជាអ្នកនិពន្ធសៀវភៅរូបនោះក៏បានញុះញង់ឱ្យស្ត្រីជាអ្នកតាមលោក ២ នាក់ទៅវាយធ្វើបាបនាង Cai។ អាជ្ញាធរទម្លាយទៀតថា ពេលនោះជនរងគ្រោះបានលុតជង្គង់សុំទោស និង សុំកុំវាយធ្វើបាបនាងទៀតអី ប៉ុន្តែពួកគេនៅតែមិនមានក្ដីមេត្តាវាយដំនាងរហូតទាល់សន្លប់បាត់ស្មារតី និង ចុងក្រោយត្រូវផុតដង្ហើមស្លាប់នៅនឹងកន្លែង។
អ្នកនិពន្ធ Wang Yun រួមទាំងគ្នីគ្នាបានយកស្កុតមករុំសពនាង Cai រួមទាំងយកខ្សែនីឡុងចងនាងជាប់រទេះដឹងទៅព្រះវិហារវិញដើម្បីបង្វែងដានថាជាករណីគ្រោះថ្នាក់។ ក្រោយមកពួកគេក៏បានដកយកប្រាក់សន្សំរបស់ជនរងគ្រោះចំនួន ២ លានដុល្លារតៃវ៉ាន់ (ប្រមាណជាង ៦ ម៉ឺនដុល្លារ) ចេញពីកុងធនាគារនាងអស់ទៀតផង។ ចំពោះករណីតារាសម្ដែង Lee Wei វិញ ដោយសារតែលោកជាអ្នកចូលវិហារម្នាក់ដែរ ដូចនេះលោកក៏ត្រូវបានប៉ូលិសកោះហៅសួរនាំក្នុងនាមជាអ្នកបានឃើញហេតុការណ៍ ដោយក្នុងអំឡុងខែមករា ឆ្នាំ ២០២៥ កន្លងទៅ ប៉ូលិសកោះហៅលោកសាកសួរចំនួន ៣ លើកក្នុងនាមជាសាក្សី ប៉ុន្តែក្រោយការសាកសួរលើកទី ៤ កាលពីថ្ងៃទី ២៤ ខែកុម្ភៈ កន្លងទៅ លោកក៏ត្រូវប៉ូលិសប្ដូរពីសាក្សីទៅជាជនសង្ស័យវិញ៕
ប្រភព៖ Kenh14, dramapanda
