Yuka Kinoshita ជា Influencer ដ៏ល្បីឈ្មោះប្រចាំប្រទេសជប៉ុនពូកែខាងញ៉ាំអាហារបានច្រើនលើសលប់នោះ ថ្មីៗនេះ នាងបានចេញមកប្រកាសថា នាងនឹងចូលនិវត្តន៍លែងផលិតវីដេអូញ៉ាំអាហារច្រើនៗខ្លាំងតទៅទៀតហើយ ដោយសារបញ្ហាសុខភាព និង អាយុកាន់តែជ្រេទៅមុខ។
ការប្រកាសដ៏ភ្ញាក់ផ្អើលរបស់នាងនេះដែរបានធ្វើឡើងកាលពីថ្ងៃទី ០១ ខែកុម្ភៈ ឆ្នាំ ២០២៥ កន្លងទៅ ត្រឹមពេលប៉ុន្មានខែក្រោយនាងវិលត្រឡប់មកកាន់បណ្ដាញសង្គមវិញក្រោយសម្រាករយៈពេល ៧ ខែ។ តាមការវៀបរាប់ Yuka Kinoshita បានឱ្យដឹងថា៖ «នៅថ្ងៃទី ០៤ ខែកុម្ភៈ ខ្ញុំកើនអាយុចូល ៤០ ឆ្នាំហើយ ដូចនេះវាពិបាកសម្រាប់ខ្ញុំក្នុងការបន្តការងារជាអ្នកញ៉ាំអាហារច្រើនៗខ្លាំងដូចមុននោះ។ ខ្ញុំពិតជាហត់នឿយខ្លាំង សុខភាពរបស់ខ្ញុំក៏ចុះខ្សោយទៅពីមួយឆ្នាំទៅមួយឆ្នាំ។ សម្រាប់ការញ៉ាំអាហារដូចមនុស្សទូទៅគឺមិនអីនោះទេ ប៉ុន្តែខ្ញុំអាចមានអារម្មណ៍ថាហត់ពេលញ៉ាំអត់ឆ្អែត។ ដូច្នេះហើយ ខ្ញុំខ្លាចថាខ្ញុំមិនអាចញ៉ាំអាហារបានច្រើនដូចកាលពីមុនបាន»។
គួររំឭកថា នាង Yuka Kinoshita បានក្លាយជាបុគ្គលល្បីល្បាញម្នាក់លើបណ្ដាញសង្គមកាលពីឆ្នាំ ២០០៩ កន្លងទៅ រហូតជាប់ឈ្មោះជា «នារីក្រពះយក្ស» ក្រោយនាងបានបង្ហាញខ្លួនចូលរួមកម្មវិធីកម្សាន្តរបស់ជប៉ុនមួយឈ្មោះថា «The Battle of Big Eaters» ដោយពេលនោះនាងមិនបានឈ្នះការប្រកួតក៏ពិតមែន ប៉ុន្តែការដែលអាចញ៉ាំអាហារបានច្រើនលើសលប់ជាមួយនឹងរូបរាងដ៏តូចស្លីមរបស់នាងបានទាក់ទាញចំណាប់អារម្មណ៍មហាជនជាច្រើន។
ក្រោយមក ក្នុងឆ្នាំ ២០១៤ នាងក៏បានចាប់ផ្ដើមបង្កើត channel ផ្ទាល់ខ្លួនមួយដោយទុកសម្រាប់បង្ហោះចែកចាយពីវីដេអូនៃការញ៉ាំរបស់នាង។ វីដេអូដែលនាងទទួលបានជោគជ័យ និង ផ្ទុះល្បីខ្លាំងបំផុតនោះរួមមានវីដេអូញ៉ាំមាន់បំពងចំនួន ៦០០ ដុំ វីដេអូញ៉ាំបឺហ្គឺចំនួន ១០០ កញ្ចប់ វីដេអូញ៉ាំស្តេកចំនួន ៥ គីឡូ និង វីដេអូញ៉ាំមីរ៉ាមែនចំនួន ៥ គីឡូជាដើម៕
ប្រភព៖ SCMP
