«លុយ មិនអាចទិញក្ដីសុខសុភមង្គលបានឡើយ» សុភាសិតមួយនេះ គឺអាចនឹងពិបាកស្វែងយល់បន្តិច ព្រោះថាទស្សនៈរបស់មនុស្សខ្លះអាចនឹងយល់ស្រប ខណៈខ្លះទៀតក៏បែរជាគិតថាមិនត្រូវនោះឡើយ។ មនុស្សមួយចំនួនធំ គឺបានគិតថាពេលមានទ្រព្យលែងខ្វះមុខខ្វះក្រោយ ក្ដីសុខរបស់ពួកគេបែរជាកាត់បន្ថយទៅវិញ ស្របពេលមនុស្សមួយចំនួនទៀតបានអះអាងថា ពេលដែលមានលុយលែងខ្វះខាត ពេលនោះហើយគឺជាពេលដែលមានក្ដីសុខបំផុត។
យ៉ាងណាមិញ ខណៈពេលដែលទំនាក់ទំនងរវាងទ្រព្យសម្បត្តិលុយកាក់ និង ក្ដីសុខសុភមង្គលនេះ នៅតែមានការគិតខុសៗគ្នានោះ ឥលូវនេះ អ្នកជំនាញក៏បានសិក្សាលើសុភាសិតមួយនេះ ហើយក៏ធ្វើការពិសោធលើមនុស្សជាច្រើនដោយជាលទ្ធផលទទួលបាននោះគឺរកឃើញថា «លុយ ពិតជាអាចទិញសុភមង្គលបានពិតប្រាកដមែន»។
តាមការសិក្សា ជនជាតិអាមេរិកភាគច្រើនជឿជាក់ថាការដែលមានលុយគឺអាចធ្វើឱ្យពួកគេកាន់តែមានក្ដីសុខ។ ជាការបញ្ជាក់ឱ្យកាន់តែច្បាស់ លោក Daniel Kahneman និង Matthew Killingsworth អ្នកជំនាញមកពីមហាវិទ្យាល័យ Princeton និង មហាវិទ្យាល័យ Pennsylvania ក៏បានធ្វើការសិក្សាពិសោធលើករណីនេះ។
តាមការសិក្សារបស់លោក Kahneman និង លោក Killingsworth បានបង្ហាញឱ្យឃើញថា នៅពេលដែលប្រាក់ចំណូលដែលរកបានកាន់តែកើនឡើង នោះក្ដីសុខរបស់មនុស្សក៏ឡើងតាមនោះដែរ។ ការសិក្សារបស់លោក គឺធ្វើឡើងតាមការវាយតម្លៃព័ត៌មានដែលធ្វើឡើងលើពលរដ្ឋអាមេរិកចំនួន ៣៣ ០០០ នាក់ ដោយអ្នកដែលមានប្រាក់ខែទាបបំផុតគឺ ១ ម៉ឺនដុល្លារក្នុងមួយឆ្នាំ។
តាមរបាយការណ៍សិក្សាដែលបានចេញផ្សាយលើ Proceedings of the National Academy of Sciences អ្នកជំនាញទាំង ២ រូបនេះ បានធ្វើការប្រមូលទិន្នន័យដោយប្រើប្រាស់កម្មវិធីមួយលើទូរស័ព្ទ ដែលកម្មវិធីនោះបង្ហាញឱ្យឃើញពីអារម្មណ៍របស់មនុស្សប្រចាំថ្ងៃ។ ក្រោយមក ពួកគេក៏បានធ្វើការគណនាទិន្ន័យដែលទទួលបាន ដោយប្រៀបធៀបអារម្មណ៍របស់មនុស្សទាំងនោះទៅនឹងប្រាក់ចំណូលរបស់ពួកគេ ដែលជាលទ្ធផលពួកគេបានរកឃើញថាមនុស្សដែលមានប្រាក់ចំណូលរហូតដល់ ៥០ ម៉ឺនដុល្លារក្នុងមួយឆ្នាំ គឺមានអារម្មណ៍រីករាយជាងអ្នកដែលមានប្រាក់ចំណូលទាប។ យ៉ាងណាមិញ ក៏មានករណីលើកលែងចំពោះអ្នកដែលមានទ្រព្យសម្បត្តិច្រើនស្រាប់ តែមិនមានក្ដីសុខ។
ដូច្នេះហើយ ការមានទ្រព្យមានលុយកាក់ច្រើនស្រាប់ៗ មិនប្រាកដថាអាចជួយឱ្យយើងកាន់តែរីករាយនោះទេ ប៉ុន្តែសម្រាប់មនុស្សមួយភាគធំដែលមានលុយកាក់ច្រើនពីការខិតខំ ឬ តាមករណីផ្សេងៗទៀតនោះ គឺពិតជាអាចជួយឱ្យពួកគេកាន់តែមានក្ដីសុខពិតប្រាកដមែន៕
