កាលពីព្រឹកថ្ងៃទី ០៣ ខែកុម្ភៈ ឆ្នាំ ២០២៥ កន្លងទៅ ក្រុមគ្រួសាររបស់តារាសម្ដែងស្រី Barbie Hsu រួមទាំងក្រុមហ៊ុនរបស់នាងបានចេញមកប្រកាសឱ្យមហាជនក៏ដូចជាអ្នកគាំទ្ររបស់នាងដឹងថា Barbie បានទទួលមរណភាពទៅហើយនៅប្រទេសជប៉ុនក្នុងវ័យ ៤៨ ឆ្នាំ ហើយចំពោះមូលហេតុនោះគឺបណ្ដាលមកពីការឆ្លងរោគផ្ដាសាយឈានដល់ការរលាកសួតធ្ងន់ធ្ងរ។ ដំណឹងមរណភាពភ្លាមៗរបស់កំពូលតារាស្រីនៅតៃវ៉ាន់រូបនេះ បានធ្វើឱ្យមហាជនជាច្រើនមានការតក់ស្លុត និង សោកស្ដាយជាខ្លាំង។
អ្វីដែលកាន់តែធ្វើឱ្យមហាជនក្តុកក្តួលខ្លាំងជាងនេះទៀតនោះ គឺនៅពេលដែលពួកគេរកឃើញថា ថ្ងៃទី ០៨ ខែកុម្ភៈ គឺជាថ្ងៃខួបអាពាហ៍ពិពាហ៍របស់តារាស្រី Barbie Hsu និង DJ ប្រចាំប្រទេសកូរ៉េ លោក Koo Jun Yup (DJ Koo)។ រយៈពេលត្រឹមតែ ៥ ថ្ងៃទៀតប៉ុណ្ណោះដល់ថ្ងៃពិសេសរបស់នាង និង ស្វាមីហើយ តែនាងបែរជាមកជួបរឿងអកុសលត្រូវបែកពីប្ដីគ្មានថ្ងៃជួបវិញបែបនេះ។ នេះចាត់ទុកជារឿងដ៏សោកសៅបំផុតមួយសម្រាប់លោក Koo Jun Yup រួមទាំងក្រុមគ្រួសាររបស់ Barbie ទាំងមូល។ ជាមួយនឹងក្ដីឈឺចាប់ និង កំពុងកាន់ទុក្ខភរិយាសំណព្វចិត្ត DJ Koo គឺនិយាយអ្វីមិនចេញនោះឡើយបានត្រឹមពោលពាក្យប៉ុន្មានម៉ាត់តាមទូរស័ព្ទជាមួយកាសែតកូរ៉េ Ilgan Sports ដោយនិយាយថា៖ «I am not okay»។
គួរបញ្ជាក់ថា រូបភាពបង្ហោះចុងក្រោយរបស់ Barbie Hsu ជាមួយស្វាមីលើបណ្ដាញសង្គមផ្ទាល់របស់នាងគឺនៅថ្ងៃទី ២១ ខែធ្នូ ឆ្នាំ ២០២៤ កន្លងទៅ ដែលជារូបនាងថតអំឡុងពេលលោក DJ Koo សម្ដែងនៅកម្មវិធី KBS Gayo Daeyeon។ នាងថែមទាំងបាននិយាយសរសើរប្ដីពេញៗមាត់ថាជាសិល្បករដែលមានទេពកោសល្យ និង អស្ចារ្យបំផុត។ បន្ថែមពីនេះ កាលពីថ្ងៃទី ២៥ ខែមករា ឆ្នាំ ២០២៥ កន្លងទៅ រូបនាងក៏បានឃើញថតរូបយ៉ាងសប្បាយរីករាយជាមួយស្វាមី អំឡុងពេលចូលរួមកម្មវិធីជប់លៀងមួយជាមួយមិត្តរួមសិល្បៈផងដែរ។
តារាសម្ដែងស្រី Barbie Hsu និង លោក Koo Jun Yup បានចាប់ផ្ដើមទាក់ទងស្នេហាគ្នាដំបូងក្នុងឆ្នាំ ១៩៩៨ ប៉ុន្តែមួយឆ្នាំក្រោយមក ពួកគេក៏បានចែកផ្លូវគ្នាដោយសារតែភាពមមាញឹកនឹងការងារ។ រហូតមកដល់ឆ្នាំ ២០២១ ក្រោយឮដំណឹងថា Barbie បានលែងលះគ្នាជាមួយស្វាមីជាអ្នកជំនួញលោក Wang Xiaofei លោក Koo ក៏បានរកឃើញលេខទូរស័ព្ទចាស់របស់អតីតសង្សារ ហើយក៏ទាក់ទងទៅលួងលោមនាង។ ក្រោយឆាតអនឡាញចុះឡើងៗរយៈពេលប៉ុន្មានខែ ស្នេហ៍ចាស់ក៏រើឡើងវិញហើយពួកគេក៏សម្រេចចិត្តបង្កាត់ភ្លើងស្នេហ៍ជាថ្មី។ នៅថ្ងៃទី ០៨ ខែកុម្ភៈ ឆ្នាំ ២០២២ Barbie Hsu និង Koo Jun Yup បានចុះអេតាស៊ីវិលជាមួយគ្នាស្ងាត់ៗក្នុងប្រទេសកូរ៉េ ហើយមកដល់ថ្ងៃទី ០៨ ខែមីនា ឆ្នាំ ២០២២ ដដែល គូស្នេហ៍តារាមួយគូនេះក៏បានចេញមកប្រកាសថាពួកគេនឹងចាប់ដៃគ្នារៀបការម្ដងទៀតនៅតៃវ៉ាន់ ដោយការចុះសំបុត្រអាពាហ៍ពិពាហ៍ទី ២ នេះពួកគេធ្វើឡើងនៅថ្ងៃទី ២៨ ខែមីនា ឆ្នាំ ២០២២។ ក្នុងខែមិថុនា ឆ្នាំ ២០២២ Barbie Hsu និង DJ Koo បានរៀបចំពិធីរៀបការតូចមួយនៅផ្ទះ ដោយក្រោយមក DJ Koo ក៏បានផ្លាស់មកនៅតៃវ៉ាន់ដើម្បីរួមរស់ជាមួយប្រពន្ធ និង កូនៗទាំង ២ នាក់របស់នាង៕
