ចំនួនសមាជិកក្រុមអ្នកលេង Yakuza ក្នុងប្រទេសជប៉ុន បានធ្លាក់ចុះមកក្រោម ២ ម៉ឺននាក់ជាលើកដំបូង ក្រោយពីថយចុះចំនួនអស់ ២ ទសវត្សរ៍ដោយសារតែការបង្ក្រាបរបស់ប៉ូលិស។
Photo: AFP
តាមការប្រកាសពីទីភ្នាក់ងារប៉ូលិសជាតិកាលពីថ្ងៃទី ០៣ ខែមេសា ឆ្នាំ ២០២៥ កន្លងទៅបានឱ្យដឹងថា ចំនួនសមាជិកក្រុមអ្នកលេង Yakuza ទូទាំងប្រទេសជប៉ុនក្នុងឆ្នាំ ២០២៤ គឺមានចំនួន ១៨៨០០ នាក់។ នេះជាលើកដំបូងហើយក្នុងប្រវត្តិសាស្ត្ររបស់ជប៉ុនដែលចំនួនសមាជិក Yakuza ធ្លាក់ចុះខ្លាំងមកក្រោម ២ ម៉ឺននាក់បែបនេះ។
គួរឱ្យដឹងថា ក្រុមអ្នកលេង Yakuza បានធ្លាក់ចុះតាំងពីឆ្នាំ ២០០៥ មកម្ល៉េះ ដោយមួយផ្នែកដោយសារតែការបង្ក្រាបរបស់អាជ្ញាធរលើទីផ្សារងងឹត។ ដោយឡែក បើទោះជាមានការថយចុះនៃចំនួនសមាជិកក៏ពិតមែន ប៉ុន្តែក្រុម Yakuza នៅតែមានសកម្មភាពបទឧក្រិដ្ឋក្នុងទីផ្សារងងឹតជាមួយនឹងប្រភពចំណូលចម្រុះ នេះបើតាមការព្រមានពីប៉ូលិសជប៉ុន។
Photo: Sky News
តាមអ្នកសង្កេតការណ៍បានលើកឡើងថា បទឧក្រិដ្ឋក្រៅម៉ោងនៅជប៉ុន គឺជាទម្រង់សកម្មភាពថ្មីមួយរបស់ក្រុម Yakuza។ បទឧក្រិដ្ឋប្រភេទនេះហៅថា «tokuryu» ដែលជាការជួលឧក្រិដ្ឋជនតាមបណ្ដាញសង្គម ហើយជាញឹកញាប់គោលដៅរបស់ពួកគេគឺជាយុវវ័យដែលត្រូវការលុយចាំបាច់។
សមាជិក Yakuza ខ្លះត្រូវបានចោទប្រកាន់លើសកម្មភាពបទឧក្រិដ្ឋ tokuryu នេះ។ ប៉ូលិសជប៉ុនបាននិយាយថា សកម្មភាពក្លែងបន្លំ និង បោកប្រាស់ដោយឧក្រិដ្ឋជន tokuryu អាចធ្វើឱ្យប្រទេសជប៉ុនខាតបង់ប្រាក់ ១.៨ ពាន់លានដុល្លារក្នុងឆ្នាំ ២០២៤ បើធៀបនឹងឆ្នាំ ២០១៩ គឺលើសដល់ជាង ៤២០ លានដុល្លារ៕
Photo: AFP
